За новиот повик за бојкот на маркетите што деновиве се шири на социјалните мрежи, а кој треба да биде утре и кој го нарекуваат „црн петок за маркетите“, денеска премиерот Христијан Мицкоски, исто како и за минатонеделниот, рече дека има разбирање за револтот кај граѓаните
Владата го чека извештајот на Државниот пазарен инспекторат (ДПИ) што ќе се однесува на контролите направени кај дистрибутерите, добавувачите, производителите и трговците и утре или в понеделник ќе информира за мерките што ќе бидат преземени во однос на поскапувањата на основните прехранбени производи, а поради кои граѓаните организираат бојкот на поголемите синџири маркети.
Министерот за економија и труд Бесар Дурмиши вели дека е легитимно правото на граѓаните за бојкот на маркетите и оти ги разбира.
„Спремни сме и ќе ги преземеме сите мерки што ги имаме за да ги спречиме овие незгодни ситуации“,
рече Дурмиши на денешната прес-конференција на која даваше само кратки одговори под изговор дека не сака да излегува од темата за која била свикана.
Прашан кој е механизмот во однос на бојкотот што се најавува за утре и дали е тоа само да дава поддршка или, пак, ќе ја извади од фиока одлуката за замрзнување на цените, Дурмиши рече дека утре ќе известат за сето тоа што се случувало изминатите две до три недели и дека шпекулативниот начин на генерирање огромни приходи на грбот на граѓаните нема да се толерира.
„Течат контролите на дистрибутерите, добавувачите, производителите и трговците. Надзор се врши врз целокупниот процес, се контролира и колкава е маржата ставена од трговците за период од шест месеци, дали таму е чепкано и врз основа на тој извештај од Инспекторатот, како влада ќе преземеме соодветни мерки“,
рече Дурмиши додавајќи дека и ДПИ ќе излезе во јавноста со податоците.
На новинарско прашање како во буџетот ќе се надополнат изгубените пари од деновите кога има бојкот на маркетите, кои според податоците од Управата за јавни приходи само од денот кога беше бојкотот се 18 милиони денари, Дурмиши повторно рече дека мерките ќе бидат преземени врз основа на извештајот на ДПИ.
„Поради тоа што имавме информации дека се зголемени цените на основните производи затоа кажавме дека ги разбираме и веднаш преземавме чекори – држевме состанок со КЗК и ДПИ, додвме насока да излезат на терен и да следат за шест месеци како се движеле цените на маркетите. Кога ќе заврши таа процедура врз основа на тој извештај ќе ги преземеме мерките“,
додаде тој.
Министерот соопшти и дека во понеделник ќе се одржи и средба со претставници на синдикатите, Организацијата на потрошувачите, Државниот завод за статистика, министерствата за финансии и за земјоделство, како и со претставници на сите останати релевантни институции околу новата методологија за пресметување на потрошувачката кошница.
Во однос на минималната плата, Дуримиши напомена дека Владата ја поддржува методологијата усогласена и потпишана од двете страни, синдикатите и работодавачите.
„Ако синдикатите и работодавачите се усогласат за нова методологија или за некои нови услови, нови пресметка, ние сме тука да ги поддржиме“,
рече министерот.
За новиот повик за бојкот на маркетите што деновиве се шири на социјалните мрежи, а кој треба да биде утре и кој го нарекуваат „црн петок за маркетите“, денеска премиерот Христијан Мицкоски, исто како и за минатонеделниот, рече дека има разбирање за револтот кај граѓаните.
Тој очекува дека преку дијалог со производителите, дистрибутерите, маркетите и потрошувачите ќе го надминат сето ова што се случува, за да нема ескалации и да нема поголеми последици.
„Јас сум еден од потрошувачите и да, понекогаш сум револтиран кога плаќам исти производи по повисока цена од тие цени коишто се во соседството. Ова е дел од проблемот, а имаме и други проблеми како што се друг тип на трговци, друг тип на производи. Има производи што ако се споредат со тие од околината се некогаш два до трипати поскапи“,
изјави Мицкоски.
Тој смета дека невозможно е тоа да е последица на лоша зделка, или на некои царински давачки, или на нешто друго.
Во петокот голем број граѓани одлучија да го поддржат бојкотот што се иницираше на социјалните мрежи и да ги заобиколат големите синџири маркети, како реакција на високите цени на производите.
Отсуството на редици на касите во маркетите беше забележливо уште од утрото, со отворањето на вратите за потрошувачите, а сликата на полупразни маркети продолжи и во текот на денот.
Повиците за бојкот на маркетите што изминатата недела се ширеа на социјалните мрежи дојдоа откако се појавија вести за слични граѓански акции во регионот – во Хрватска, Босна и Херцеговина и во други држави.
Најавата за бојкот наиде на оправдување кај целата јавност, а поддршка доби од политичките партии и од власта и од опозицијата.