Дали имало пропусти во судската постапка против Јованов или немало, ќе испитува тричлена комисија на Судскиот совет, која, како што денеска беше одлучено, ќе ја сочинуваат членовите на Советот – судијката Данка Ристова, нејзината колешка Антоанета Димовска и членката на Советот, Тања Чачарова Илиевска
Одговарајќи на новинарско прашање дали ќе се чека одлуката на Апелација или ќе се постапува паралелно, претседателот на Судскиот совет кажа дека ќе се постапува паралелно, со тоа што, како што рече, убаво би било да се внимава да не се создава притисок врз второстепениот суд
Судскиот совет на денешната седница формира комисија која треба во рамките на своите надлежности да утврди дали имало пропусти во одлучувањето на Основниот кривичен суд Скопје во предметот против Васил Јованов за поседување наркотици.
Дваесетгодишниот Јованов, кој е притворен откако со автомобил, возејќи под дејство на алкохол и поминувајќи на црвено светло смртно ја прегази 22-годишната Фросина Кулакова, лани во јули со судско решение добил мерка за упатување во воспитно-поправен дом во Тетово, поради поседување и продажба на марихуана и кокаин.
Пресудата и натаму е неправосилна, бидејќи предметот се наоѓа во жалбена постапка во Апелацискиот суд Скопје, кој сè уште не се произнел.
Дали имало пропусти во судската постапка против Јованов или немало, ќе испитува тричлена комисија на Судскиот совет, која, како што денеска беше одлучено, ќе ја сочинуваат членовите на Советот – судијката Данка Ристова, нејзината колешка Антоанета Димовска и членката на Советот, Тања Чачарова Илиевска.
Комисијата, како што изјави претседателот на Судскиот совет, Александар Камбовски, по седницата, првично ќе треба да изврши увид во предметот и откако ќе заврши да направи свој извештај.
Во врска со постапувањето на комисијата, тој рече дека е малку чувствително времето затоа што предметот во овој момент се наоѓа на постапување во Апелацискиот суд Скопје.
„Треба внимателно да постапува комисијата за да не создаде притисок врз Апелацискиот суд бидејќи тие мора да одлучат по таа првостепена пресуда. Ако е добра, ќе ја потврдат, ако сметаат дека не е во ред, дека постојат одредени повреди на постапката, ќе ја укинат или можеби ќе ја преиначат. Затоа треба комисијата внимателно да изврши увид и откако ќе заврши, ќе направи свој извештај“,
рече Камбовски.
Одговарајќи на новинарско прашање дали ќе се чека одлуката на Апелација или ќе се постапува паралелно, претседателот на Судскиот совет кажа дека ќе се постапува паралелно, со тоа што, како што повтори, убаво би било да се внимава да не се создава притисок врз второстепениот суд.
„Убаво би било да внимаваме бидејќи не сакаме Апелацискиот суд да почувствува некаков притисок од нас. Доволен е притисокот што веќе го има од јавноста врз тој суд“,
рече Камбовски.
За време на расправата на седницата, се разви дискусија околу тоа кој треба да биде во составот на комисијата и дали евентуално се потребни две комисии бидејќи по предметот се постапувало во Основниот кривичен суд, а сега тој е пред Апелација.
„Можеби претседателот смета дека покрај предметот од Основниот кривичен суд Скопје треба да се изврши увид и во предметот во Апелацискиот суд Скопје бидејќи од она што сме запознаени од јавноста имаме сознанија дека предметот е во постапка на жалба. Така што можеби предлогот е да се формира работна група и го поддржувам, мора да дадеме одговори на јавноста којашто во овој момент е сензитивна, па мојот предлог е освен координаторот за Основниот кривичен суд да биде и координаторот за Апелацискиот суд Скопје и евентуално уште еден член, нека се пријави, јас би го поддржала. Меѓутоа во комисијата треба да бидат координаторите за двата суда“,
рече Весна Дамева.
Судијката и членка на Судскиот совет, Џенета Бектовиќ, веднаш рече оти се иззема од учество во комисијата бидеjќи доаѓа од скопскиот Основен кривичен суд.
Камбовски првично предложи во состав на комисијата да бидат Данка Ристова, судијата Ханиф Зендели и Антоанета Димовска, но по дискусијата и дилемите што се јавија Дамева предложи во неа да биде и Тања Чачарова-Илиевска за да се задоволи принципот на пропорционалност, односно двајца членови да бидат од редовите на судиите и еден од членовите избрани на предлог на Собранието.
По ова се разви дискусија меѓу Димовска и Чачарова-Илиевска околу прашањето колку комисии треба да има.
„Колешке Тања, сега ќе остане недоречено, вие зборувате за две одделни комисии, јас како координатор на Апелацискиот суд со други два члена и координаторот на Основниот кривичен суд со два члена. Мислам дека е добро ова што го предлага претседателот да биде една комисија, а не да бидат две комисии затоа што треба брзо да се испита“,
рече Димовска.
На ова таа веднаш доби реплика од Чачарова-Иливеска, во која рече:
„За да не излезме недоречени, колешке, во предметот на Апелацискиот суд немате ништо затоа што е пратен по жалба, одлуката ли ќе ја гледате, таа веројатно не е ни донесена. А предметот може од Апелација да се симне на увид во Основниот кривичен суд. Затоа зборувам апсолутно не е специфична, и такви ситуации сме имале многу. Но како ќе се договориме, така, нема специфика во случајот.
На крајот, Камбовски го стави предлогот на Дамева на гласање, по што констатира дека е формирана комисијата на Судскиот совет која ќе го испита предметот согласно своите надлежности.
Откако во јавноста се дозна дека против осомничениот Јованов се водел судски процес за поседување наркотици, кој завршил со воспитна мерка, Кривичниот суд минатата недела, иако неправосилна, ја објави пресудата.
Од Судот реагираа и вчера наведувајќи дека судијата Даниела Алексовска-Стојановска при одлучувањето за санкцијата се водела исклучиво согласно законските одредби, слободното судиско убедување и воспоставената судска пракса, како и наводите на јавниот обвинител.
Оттаму како неточни ги отфрлија шпекулациите дека обвинетиот бил претходно осудуван и се воделе други кривични постапки против него.
„Прашање е дали доколку била изречена и казна затвор, мерката притвор ќе можела да опстои пред повисоките судски инстанци имајќи ја предвид досегашната судска пракса, препораките од Судот за човекови права во Стразбур и постојани критики на Меѓународната заедница дека мерката притвор не смее да се користи како казна. Дотолку повеќе што и при укинување на мерката притвор, јавниот обвинител не вложил жалба на притворот, туку вложил само на кривичната санкција“,
наведоа вчера од Кривичниот суд.
За в сабота во Неготино е најавен нов протест на кој ќе се бара правда за смртта на 22-годишната Фросина Кулакова.
Претходно минатата недела во Скопје се одржаа два протести на кои студенти и граѓани бараа одговори за околностите кои доведоа младата девојка да го загуби својот живот на таков начин.