По денешниот бојкот на маркетите поради високите цени на основните прехранбени продукти, од Управата за јавни приходи (УЈП) најавија дека ќе излезат со информација дали и за колку е намален прометот во трговските синџири
Голем број граѓани на земјава денеска одлучија да го поддржат бојкотот и да ги заобиколат големите ланци маркети, како реакција на високите цени на производите.
Отсуството на редици на касите во маркетите беше забележливо уште денеска наутро, со отворањето на вратите за потрошувачите, а сликата на полупразни маркети продолжи и во текот на денот, пренесуваат телевизиите.
Сепак, имаше и граѓани кои решија да пазаруваат и денеска како и секој ден, но очигледно во помал број од оние кои се одзваа на повикот за бојкот на социјалните мрежи.
Граѓаните не се сигурни колку вкавите иницијативи ќе имаат ефект, но велат дека тие ја испратиле својата порака.
„Не знам дали ќе има ефект но ние како граѓани испративме порака. Сега е до Владата. Па и до трговците. Прескапо е се“,
ја пренесува „Гласот на Америка“ на македонски јазик, изјавата на жител на скопската населба Карпош 4.
Други сметаат дека треба да се бојкотира подолго.
„Јас мислам дека треба да трае повеќе дена. И не само ланците маркети. Не е само кај нив проблемот, цените поскапеа сегде и во кафулиња и во ресторани и на пазар. Вака еден ден бојкот нема да даде резултат“,
изјавил Мартин од Скопје.
Министерката за финансии, Гордана Димитриеска-Кочоска најави драконски казни за сите компании во државата доколку не го почитуваат Законот за забрана на нефер трговски практики.
„Апелирам до сите, не само трговските ланци, до сите компании во државата. Да се почитуваат законите, ништо повеќе од тоа. Во некој момент било кој од институциите ќе излезе на терен, ќе направи контрола и ќе се врати назад. Ќе следат драконски казни. Молам само да се почитува Законот за нефер трговски практики и да не се злоупотребува моментот ако некоја надлежна институција не излегла во контрола на маркет. Ќе излезе, ќе се врати наназад и ќе ги констатира состојбите“,
изјави Димитриеска-Кочоска.
Претседателот на Стопанската Комора, Бранко Азески, вели дека постои ризик бојкотирањето да стане секојдневие. Излезот од ситуацијата го гледа во дијалог.
„Мислам дека овие нови форми и методи на вакви активности кои што одат преку социјалните мрежи ќе станат секојдневие и ние треба да ги почитуваме и поддржуваме. Но тоа треба да биде знак за сериозен разговор кој ќе довее до решение а не само да се регистрира проблемот. Ние донесовме еден закон кој требаше да спречи вакви работи и тој предизвика силни тензии во општеството и меѓу институциите. Ние ќе се однесуваме најодговорно и со Владата ќе бараме решение. Ќе поддржам се што има реална основа но ќе инсистирам како претседател на Комората каде се и овие ланци на маркет да се најде решение низ дијалог“,
изјави Азески.
По денешниот бојкот на маркетите поради високите цени на основните прехранбени продукти, од Управата за јавни приходи најавија дека ќе излезат со информација дали и за колку е намален прометот во трговските синџири.
Повиците за бојкот на маркетите што изминатата недела се ширеа на социјалните мрежи дојдоа откако се појавија вести за слични граѓански акции во регионот – во Хрватска, Босна и Херцеговина и во други држави.
Најавата за бојкот наиде на оправдување кај целата јавност, а поддршка доби од политичките партии и од власта и од опозицијата.
Податоците на Сојузот на синдикати на Македонија покажуваат дека минималните трошоци на едно четиричлено семејство во јануари се зголемени за 391 денар во однос на декември. Во делот на храната и пијалаците се бележи зголемување од 123 денари. Воедно од ССМ, посочуваат дека вредноста на синдикалната минимална кошничка за само една година пораснала за 6.089 денари, што значи зголемување од 10,63 проценти.
Најновите статистички податоци покажуваат дека трошоците за живот во 2024 година во однос на 2023 година бележат пораст од 3,5 проценти, а цените на мало од 3,8 проценти.
Бојкот на големите ланци маркети денеска има во Србија, Хрватска, Црна Гора, Словенија и Босна и Херцеговина.