Седницата на Уставниот суд на која се најде и иницијатива на Стопанската комора за работа во недела заврши без одлука, а ова, како што посочи портпаролката на Судот, е уште еден од четириесетте предмети кои не поминаа на седница поради тоа што нема доволно судии
Од судот велат дека на иницијативата од Стопанската комора во однос на работа во недела ќе се навратат тогаш кога Собранието ќе го комплетира Уставниот суд со доволен број судии
Поради недоволно мнозинство на гласови, Уставниот суд на денешната седница не донесе одлука по иницијативата на Стопанската комора која го оспорува Законот за изменување и дополнување на Законот за работните односи, според кој недела е неработен ден.
Седницата на Уставниот суд на која се најде и иницијатива на Стопанската комора заврши без одлука, а ова, како што посочи портпаролката на Судот е уште еден од четириесетте предмети кои не поминаа на седница поради тоа што нема доволно судии.
„И уште еднаш, за жал, преку ваков значаен предмет за граѓаните се истакна потребата за пополнување на судиските места“,
потенцира портпаролката на Судот, Христина Беловска.
Од судот велат дека на иницијативата од Стопанската комора во однос на „работа во недела“ ќе се навратат тогаш кога Собранието ќе го комплетира Уставниот суд со доволен број на судии.
Во однос на иницијативата поднесена од Стопанската комора, судијата Осман Кадриу посочи дека станува збор за иницијатива со чувствителна содржина затоа што со неа се оспорува во целост Законот објавен во Службен весник.
„Уставот предвидува дека секое вработено лице има право на дневен, неделен и годишен одмор. Она што паѓа во очи каква е определбата на уставотворецот по овие права што ги гарантира. Уставотворецот предвидува и императивна норма во Уставот со која се вели дека под овие права работникот не мора да се откаже, тоа значи дека не постои можност спогодбено да се доведуваат во прашање неговите права за работен однос. Законодавецот како надлежен орган со законот врши конкретизација и индивидуализација кој ден во неделата да биде неработен и сосема оправдано се одлучува тоа да е недела. Законодавецот ова право го пропишува како општо право да важи за сите правни лица, предвидува и исклучоци дека ако процесот на работата тоа го бара во конкретни дејности може да се организира работата и во недела“,
рече Кадриу.
Според Кадриу, има има уставна основа која произлегува од определбите на уставотворецот за значењето на конкретните права од работен однос, а во тие е и правото да му се обезбеди платен дневен неделен и годишен одмор.
„Апсолутно не може да се доведе во прашање дека со оспорениот Закон се повредуваат уставните одредби. Со оваа иницијатива се индивидуализира и конкретизира едно право кое со Уставот се гарантира. Кога станува збор за права што Уставот ги гарантира тие добиваат на значење. Не може да се доведе во прашање сомнежот за уставноста на оспорениот Закон. Законот треба да продолжи да е во сила“,
вели Кадриу.
Според судијата Дарко Костадиновски, пак, ваквата измена на Законот е за поздравување, прифатлива и општествено нужна и неопходна.
„Но, сметам дека начинот на кој законодавецот сака да ја постигне оваа цел е уставно проблематична. Дел од наводите во иницијативата се основани. Остава простор за различни толкувања. Како се утврдува кои се тие технолошки процеси кој го цени тоа“,
рече Костадиновски додавајќи дека со оваа законска норма на министерот за труд и социјална политика му се дава законодавна надлежност за исклучоците и кои се придружни и помошни дејности.
Претседателката на Уставниот суд, Добрила Кацарска не се согласува дека во наводите нема доволно причини, посочувајќи дека е даден осврт на сите спорни елементи.
„Крајно време беше да се донесе ваков Закон. Членот 2 е многу јасен и не е спротивен на ниту една одредба од Уставот. Нема подвојување на работодавачите, секој може да работи во недела, но тоа треба да им се плати. За мене ништо не е спорно во овој реферат“,
потенцираше Кацарска.
Во иницијативата поднесена од Стопанската комора се наведува дека ден на неделен одмор може да биде кој било друг ден во неделата, дека е утврден и додаток на плата за работа во недела во износ од најмалку 50 проценти за секој час поминат на работа и од тие причини е дозволена нееднаквост на граѓаните пред законите.
Содржани се и наводи дека со ова законско решение работодавачите од економските дејности на кои им се забранува работа во недела и имаат еднаква правна положба од аспект да ги намируваат данокот и другите јавни давачки кон државата кои се утврдени со закон се ставени во нееднаква правна положба со работодавците од економските дејности на кои им е дозволено да работат во недела, од аспект да остваруваат приходи и добивка.
Сојузот на синдикати на Македонија (ССМ) вчера го повика Уставниот суд да ја отфрли иницијативата на Стопанската комора, бидејќи, како што посочи, таа е противуставна. Според ССМ, со иницијативата ќе се задре во веќе утврдено право на непрекинат неделен одмор што се состои од најмалку 24 часа за период од седум дена на илјадници работници во државата.