На седницата која се одржа на 16 ноември 2022 година Уставниот суд поведе постапка по овој предмет и во меѓувреме го запре извршувањето на поединечни акти или дејствија што се преземаат врз основа на оспорената Одлука, односно воведе таканаречена „времена мерка“
Уставниот суд утре на седница треба да донесе конечна одлука во врска со предметот со кој е оспорена одлуката на општина Центар од 2014 година за Деталениот урбанистички план кој се однесува на Градска четврт Ј 07, а која ги опфаќа Капиштец, Завод за медицинска рехабилитација, Старо Водно, Долно Водно, Мало Курило и Цвеќара.
На седницата која се одржа на 16 ноември 2022 година Уставниот суд поведе постапка по овој предмет и во меѓувреме го запре извршувањето на поединечни акти или дејствија што се преземаат врз основа на оспорената Одлука, односно воведе таканаречена „времена мерка“.
Имено, како што соопштија од Уставен на 16 ноември, причина за поведување на постапка е тоа што во иницијативата до Судот било посочено оти одлуката од Советот на Општина Центар за конкретниот ДУП не била донесена со потребното мнозинство, согласно Законот за локална самоуправа. Наместо со неопходни минимум 12 гласови, седницата на Советот на која се постапувало по оспорената одлука биле присутни 12 членови од вкупно 23 членови на Советот на Општина Центар, при што „за” гласале 11 членови, а само еден гласал „против”.
„Информираме дека ова е прва фаза кога Судот формално-правно изразува сомнеж во уставноста и законитоста на Одлуката за донесување на ДУП кој се однесува на Градска четврт Ј 07. Решението за поведување постапка ќе биде доставено на Општина Центар како доносител на актот и треба да се изјасни во одреден рок, по што советникот и судијата-известител ќе го напишат конечниот предлог кој треба да се разгледа и одлучи на седница на Уставниот суд“,
соопштија тогаш од Уставниот суд.
Инаку, ДУП Ј07 подолго време е актуелен во јавноста поради обидите за градежен упад во шумата на Водно, за кои јавноста слушна и во„бомбите” на СДСМ.
Последно, градоначалникот на Општина Центар, Горан Герасимовски, во јуни годинава соопшти дека се стопираат сите градежни дејствија за овој план, кој ги опфаќа и атрактивните парцели на Водно до кои нема пристапен пат, а за кои жителите од тој дел на населбата долго време реагираат на обиди за градежен упад во шумата.