Уште три медицински лица од гинеколошко-акушерската приватна болница „Плодност“ во Битола се позитивни на коронавирусот, информираше болницата во соопштение до јавноста објавено на нејзината страница на Фејсбук. Позитивни се тестовите на анестезиолог, гинеколог и една медицинска сестра.
Директорот на „Плодност“, Д-р Таше Трпчевски, во своето соопштение бара масовно тестирање на сите вработени бидејќи, како што вели, Институтот за јавно здравје прави проценка и не ги тестира лицата што немаат симптоми.
„Анестезиологот и медицинската сестра само еден ден беа фебрилни, сега се здрави и немаат ништо. Барав тест за гинекологот кој е од Прилеп, а е кај нас вработен, заради тоа што има епидемиолошка анамнеза. Тој е позитивен (вчера попладне ми ја даде информацијата). Тој е асимптоматски носител. Тие се најопасните како сите вие што не знаете можеби дали сте таков носител. Оттаму апелирам до министерот да ги остави препораките на СЗО и побогатите држави да се тестираат само симптоматските пациенти и оние со позитивна епидемиолошка анамнеза“,
пишува во соопштението од директорот на болницата, д-р Таше Трпчевски.
Тој посочува дека во земјава има многу повеќе заразени, отколку што се детектирани и дека неопходно е масовно тестирање, со цел сите заразени да бидат изолирани.
„Министре мислам дека е потребно помасовно тестирање на пациентите за да ги откриеме асимптоматските носители на вирусот. Така ќе се створи малку поголема паника, но ќе го спречиме ширењето на вирусот. Сè уште не е доцна, имаме уште малку време се додека не се ‘скрши здравствениот систем’, кога возот ќе замине низ брдо, а ќе треба секојдневно да се објавувате повеќе смртни случаи од новозаболени. Прифатете го мојот совет. Направете увоз на тестови“,
стои во соопштението.
Од болницата вина гледаат кај пациентите, кои како што велат, не се искрени кога даваат информации на епидемиолошкиот прашалник.
Коментирајќи ги тестовите на неговиот син, пак, гинекологот д-р Христијан Трпчевски, кој досега имал два негативни и еден позитивен резултат, директорот на „Плодност“ вели дека сè уште немаат веродостојни информации дали е позитивен или не. Дополнително ги осуди сите што, како што вели, ширеле дезинформации дека неодамна гинекологот се вратил од странство.
„Вршите притисок во МВР дека Христијан пред месец дена, 15 дена итн си дошол од Копаоник ,Банско, па од Тирол Аустрија, за да станеме предмет на вештачење на секторот за криминал од МВР. Тие имаат сознание дали Христијан ја напуштил и кога ја напуштил границата и дали бил на тие места, а сите вие кои тврдите на Фејсбук дека д-р Христијан Трпчевски беше во едно од споменатите места во последните два месеци, напишете го тоа, ама на прав, не на лажен профил. Е тоа ќе треба да го докажете и на суд, ама и ќе си ги сносите последиците од тоа судење“,
стои во соопштението.
Поврзана вест:
Третиот тест на гинекологот од Битола покажал негативен резултат на ковид-19