Уште едно лице на Инфективната клиника во Скопје чека резултати од тестот за коронавирус, соопшти денеска министерот за здравство Венко Филипче. Лицето допатувало од Дубаи со симптоми на грип, а официјалните резултати ќе бидат готови за два часа.
Претходниот ваков случај со патник од Италија, кој вчера сам се пријавил на испитувања, се покажа дека нема коронавирус.
Филипче уверува дека здравствените власти се подготвени за коронавирусот, кој тврди дека се уште не стигнал во Македонија. Дефицит на опрема, како што вели, нема, а надлежните организираат дополнителна набавка на заштитни маски, мантили и скафандери.
Од денеска почнува да функционира и кризната група во Министерството составена од експерти од областа на епидемиологијата и инфективните болести, кои ќе бидат задолжени да менаџираат со информациите и заштитните мерки за коронавирусот.
Филипче ја повика јавноста да не наседнува на лажни вести, а доколку нема потреба да не патува во земји како Италија, каде што за кратко време се прошири вирусот. За ова денеска најави дека ќе има и седница на Влада, каде што ќе биде разгледан предлогот да се откажат сите патувања на државните институции во земјите каде што има коронавирус.