Меѓу главните заклучоци од средбата, како што информираат од МНР, се обезбедувањето поддршка за функционалноста на институциите на ОБСЕ, кои нудат разновидни механизми во поддршка на обновувањето на мирот и безбедноста, спречувањето на идни конфликти, како и промовирањето на соработката низ регионот на ОБСЕ
Шефот на дипломатијата, Бујар Османи, во својство на претседавач на Организацијата за безбедност и соработка во Европа (ОБСЕ) денеска имал работна средба со министерот за надворешни работи на земјата домаќин на ОБСЕ – Австрија, Александар Шаленберг.
На средбата, како што се наведува во соопштението од МНР, министрите Османи и Шаленберг разговарале за предвидените активности во рамки на претседавањето на Северна Македонија со најголемата светска регионална безбедносна организација, во 2023 година.
Тие размениле мислења за актуелните случувања во регионот на ОБСЕ, како и за улогата на Организацијата во справувањето со последиците предизвикани со агресијата на Руската Федерација врз Украина.
„Војната на агресија против Украина продолжува, а луѓето се првите кои ја почувствуваа мачнината која ја предизвикаа денешните геополитички превирања. Најмногу страдаат оние кои се директно изложени на војна и конфликт. Другите чувствуваат несигурност и неизвесност. Нивниот начин на живеењее доведен во прашање, секојдневниот живот е нарушен. Тие треба да се ослободат од стравот од војна“,
потенцирал Османи на средбата со Шаленберг.
Меѓу главните заклучоци од средбата, како што информираат од МНР, се обезбедувањето поддршка за функционалноста на институциите на ОБСЕ, кои нудат разновидни механизми во поддршка на обновувањето на мирот и безбедноста, спречувањето на идни конфликти, како и промовирањето на соработката низ регионот на ОБСЕ.
Република Австрија, додаваат од МНР, е долгогодишен партнер на Северна Македонија во ОБСЕ и нејзин силен и гласен поддржувач во европските интеграции.
Инаку, Османи утре во седиштето на ОБСЕ во Виена ќе ги презентира приоритетите на претседавањето на С Македонија со Организацијата во 2023 година.
Шефот на дипломатијата минатата недела на брифинг со новинарите во Скопје рече дека Украина ќе доминира со претседавањето на С Македонија со ОБСЕ, а каква ќе биде комуникацијата со Русија и дали таа ќе се претвори во некаков суштински дијалог ќе зависи од тоа кој ќе биде односот на Москва кон принципите и заложбите на Организацијата и тука ние како претседавачи нема да дозволиме никакви компромиси.
Османи во своето излагање потсети дека во моментов во Украина нема мисија на ОБСЕ затоа што Русија стави вето на мисијата, а С Македонија како претседавач ќе треба да најде начин повторно да ја врати Организацијата во Украина.
За време на претседавањето на С Македонија со ОБСЕ ќе се избираат и раководителите на четирите главни институции на ОБСЕ – ОБСЕ/ОДИХР, специјален претставник за национални малцинства, претставник за медиуми, како и генерален секретаријат и генерален секретар. Тие се избираат на секои три години.
Друг голем предизвик, рече тој, е донесување на буџетот на ОБСЕ, што претходното полско претседавање со Организацијата не успеа да го донесе поради блокада од Русија и затоа што Ерменија и Азербејџан (земји меѓу кои владее замрзмат конфликт н.з.) не можеа да се усогласат со одредени ставки во буџетот.
Други приоритети, како што наведе Османи, ќе бидат владеењето на правото и борбата против корупција што, како што истакна Османи, е сериозно прашање кое ја детерминира безбедноста.