Премиерот на Обединетото Кралство, Кир Стармер смета дека Европа треба да ја игра својата улога, но дека е потребна безбедносна гаранција од САД за да се постигне трајно мировно решение за Украина. Претходно, германскиот канцелар Олаф Шолц повика на единство меѓу Европа и САД за одговорноста за безбедноста на Украина
Заврши итниот состанок на европските лидери во Елисејската палата во Париз, свикан по барање на францускиот претседател Емануел Макрон, со цел да разговараат за плановите на американскиот претседател Доналд Трамп да стави крај на војната во Украина, како и поради стравувањата дека ќе бидат исклучени од разговорите.
Голем дел од европските лидери, како што пренесуваат странските медиуми, ги соопштија своите пораки, од кои може да се заклучи оти се согласни дека Украина не смее да биде изоставена од мировните преговори, но и дека е потребно трајно решение за мир со гаранција од САД дека Русија нема да нападне.
Премиерот на Обединетото Кралство, Кир Стармер смета дека Европа треба да ја игра својата улога, но дека е потребна безбедносна гаранција од САД за да се постигне трајно мировно решение за Украина.
Според него, неодамнешните изјави на американската администрација не треба да изненадуваат, а додаде и дека Европа ќе треба „да преземе одговорност“ за својата безбедност
Претходно, германскиот канцелар Олаф Шолц повика на единство меѓу Европа и САД за одговорноста за безбедноста на Украина.
„Не смее да има поделба во однос на безбедноста и одговорноста меѓу Европа и САД“,
изјави Шолц.
Полскиот премиер Доналд Туск изјави дека не треба да се носат одлуки без Украина и Европа и тоа го опиша како нова фаза на трансатлантските односи.
Претседателката на ЕУ Урсула фон дер Лајен вели дека разговорите на самитот потврдиле дека Украина заслужува мир.
„Мир со почитување на неговата независност, суверенитет, територијален интегритет, со силни безбедносни гаранции. Европа го носи целиот свој дел од воената помош за Украина. Во исто време ни треба и пораст и на одбраната во Европа“,
напиша таа на Икс.
Today in Paris we reaffirmed that Ukraine deserves peace through strength.
— Ursula von der Leyen (@vonderleyen) February 17, 2025
Peace respectful of its independance, sovereignty, territorial integrity, with strong security guarantees.
Europe carries its full share of the military assistance to Ukraine.
At the same time we need… pic.twitter.com/xdAnkeWr4v
За данската премиерка, Мете Фредериксен, војната во Украина не смее да се прошири во други земји. Предупреди дека брзиот прекин на огнот може да и даде шанса на Русија повторно да се мобилизира и да ја нападне Украина или друга европска земја.
На самитот во Париз присуствуваа лидерите на Италија, Полска, Шпанија, Холандија и Данска, како и претседателката на Европската комисија и генералниот секретар на НАТО Марк Руте.