Наплатата на бруто ДДВ за првите 14 дена од месец април е намалена за 29,19 отсто во споредба со првите 14 дена од април во 2019 година. Односно првите 14 дена од април 2020 е наплатен бруто приход од ДДВ 1.476.684.745 денари, а во првите 14 дена од април минатата година е наплатен бруто приход од ДДВ 2.085.338.658 денари, појаснува Управата за јавни приходи, откако во дел од медиумите излегоа написи со погрешни бројки.
„По однос на насловите во дел од медиумите ‘Пад на наплатата на ДДВ од 79%’, Управата за јавни приходи појаснува дека е несоодветно извлечен новинарски заклучок за пад на наплата на ДДВ од 79%, затоа што тоа е податок за нето износ на наплатен ДДВ кој е разлика од бруто наплата на ДДВ минусирана за повратот на ДДВ за првите 14 дена од април“,
реагираат од УЈП.
Тие напоменуваат дека намалувањето на ДДВ се однесува за првите две недели од месец април, а вистинската слика за реализираниот ДДВ може да се согледа по завршување на месецот и евидентирање на сите уплати на ДДВ и реализираниот поврат.
„Во овој период од 1 до 14 април 2020 година намален е ДДВ од увоз на добра за 708 милиони денари или за 35%, но значаен е порастот на ДДВ од прометот во земјата за 80 милиони денари односно наплатен е износ од 142 милиони денари за разлика од април истиот период за 2019 година кога е наплатен износ од 61 милиони денари“,
велат од УЈП.
Во услови на вонредна состојба, додаваат од УЈП, се врши забрзан поврат на ДДВ кон фирмите така што во периодот од 1 до 14 април, е зголемен повратот на ДДВ за 412 милиони денари односно 51 отсто повеќе во однос на лани истиот период.