Директорката на УЈП, Сања Лукаревска ги повика граѓаните да пријавуваат доколку забележат дека на фискалните сметки кои им се издадени, им е наплатен и ДДВ за основните производи
Од 611 контроли низ целата држава за два дена, кај 114 трговци Управата за јавни приходи констатирала прекршување на владината Одлука за ослободување од ДДВ за основните прехранбени продукти и Законот за регистрирање на готовински плаќања.
Во контролите биле опфатени даночни обврзници кои вршат дејност трговија на мало со храна и пијалоци, со месо и производи од месо, со моторни горива и оние кои дејноста ја вршат преку повеќе деловни единици, односно со поголема продажна површина и остваруваат промет во поголем износ.
„Радува податокот што голем дел од продажните објекти ги почитуваа одредбите од Законот, но, за жал, и покрај укажувањата, имаше и такви на кои не им беа прилагодени фискалните апарати и наместо во група Г, лебот, брашното, јајцата, млекото, месото, шеќерот, оризот и зејтинот ги продаваа во група Б, односно со пресметан ДДВ од 5 проценти. Таквата постапка е казнива согласно Законот за регистрирање на готовински плаќања“,
кажа директорката на УЈП, Сања Лукаревска на денешната прес-конференција.
Инспекторите на УЈП најмногу неправилност по основ на неприлагодени фискални апарати утврдиле кај обврзници од Тетово, Струга, Скопје, Прилеп и Охрид. Лукаревска потенцира дека кај големите маркети се констатирани голем број неправилности во поглед на неприлагодени фискални апарати.
„Алармиравме и претходно дека ќе одиме на терен. Имаше доволно време да се адаптираат фискалните сметки за да не се прави злоупотреба на грбот на граѓаните. Веројатно сметале дека може да го изиграат законот, меѓутоа не е така… Како и целиот свет и нашата држава е исправена пред голем економски предизвик. Сите да бидеме солидарни, се со цел да се надмине оваа состојба. Да дадеме се од себе да го зачуваме стандардот на граѓаните и домашната економија“
порача Лукаревска.
Таа ги повика граѓаните да пријавуваат доколку забележат дека на фискалните сметки кои им се издадени, е наплатен и ДДВ за основните производи.
„Апелирам неправилностите да ги пријават на телефонската линија 198 или на 08000 33 000, како и преку апликацијата ‘Мој ДДВ’. Сите овие претставки ги сумираме и ги доставуваме до Генералниот даночен инспекторат за понатамошно постапување. УЈП и понатаму ќе ја следи состојбата на терен и ќе продолжи со координирани контроли. Сите трговци кои нема да ги почитуваат одредбите од законот, може да се соочат со глоби“,
рече Лукаревска.
Директорката на УЈП повтори дека за непочитување на законите, самостојните вршители на дејност може да се соочат со казни до 500 евра, а правните лица до 1 000 евра, зависно од нивниот продажен капацитет и претходното даночно поведение. Во однос на висината на казните, Лукаревска посочи дека законодавецот ја утврдил висината, додека нивна задача е да проверат дали законите се почитуваат.
Маркетите од 17 март се обврзани да ги прилагодат фискалните апарати и да ги продаваат основните прехранбени производи со нула отсто ДДВ. Мерката ќе важи до 31 мај, а е дел од пакетот антикризни мерки кои ги подготви Владата, а ги изгласаа во Собранието, со цел полесно справување со ценовната криза.