За време на средбата со градоначалникот на турскиот град Конја, градоначалничката на Град Скопје потпишала протокол за соработка, а како гест и потврда за воспоставените пријателски билатерални односи и соработка, градоначалникот Алтај ќе обезбеди противпожарно возило за потребите на Противпожарната бригада на Град Скопје
За потребите на противпожарната бригада, Градот Скопје ќе добие противпожарно возило од градот Конја, Турција. Ова денеска го соопшти градоначалничката на Град Скопје, Данела Арсовска, која оствари средба со градоначалникот на Конја, Угур Ибрахим Алтај, во рамки на нејзината тридневна посета во Турција.
Како што информираа од Град Скопје, градоначалниците Арсовска и Алтај за време на средбата потпишале протокол за соработка, а како гест и потврда за воспоставените пријателски билатерални односи и соработка, градоначалникот Алтај за потребите на Противпожарната бригада на град Скопје ќе обезбеди противпожарно возило.
„На работните средби кои ги остваривме во градот Конја договоривме конкретна соработка со градоначалникот Алтај, при што морам да го потенцирам пријателскиот и пречек и од желбата за интензивирање на билатералната соработка, која резултираше со гест на потврда на овие заложби од страна на Градот Конја, со доделување на противпожарно возило за потребите на Противпожарната бригада на градот Скопје, во интерес на сите скопјани“,
истакна Арсовска.
При посетата на противпожарната служба во градот Конја, Арсовска посочи дека на средбата со командантот на службата, Џевдет Ишбитриџи, се разговарало за можностите за соработка во насока на отпочнување заеднички проекти и обуки, како и размена на знаења на противпожарните бригади во делот на противпожарната заштита
Во рамки на посетата на Турција, од Град Скопје соопштија дека Арсовска и директорот на ЈП „Комунална хигиена“ Скопје, Зуди Енузи, оствариле средби со гувернерот на градот Конја, г. Вахдетин Озкан, со претседателот на Турската агенција за соработка и координација ТИКА, г. Серкан Кајалар и со претставници на деловната заедница.
„Сакам да се заблагодарам на гостопримството за време на значајни посети со кои отпочнуваме нови чекори за зајакнување на соработката, со која ќе бидат реализирани многубројни проекти за развој и просперитет во интерес на граѓаните на Скопје“,
истакна Арсовска.