Министерството за животна средина ја информира Владата дека пиковите на аерозагадувањето во Скопје и Тетово го надминуваат дозволениот праг и дека се исполнети условите за активирање на мерките за заштита од аерозагадувањето. Мерењата на Министерството покажале дека прагот на алармирање од 175 mg/m3 веќе два дена е надминат на мерните станици во Карпош, Лисиче и Тетово. Дописот со известување денеска е испратен до Владата, која треба да ги активира препораките.
Штом стапат во сила, препораките предвидуваат ослободување од работа на бремените жени, лицата постари од 60 години и хронично болните од астма и лицата со преживеани срцеви и мозочни удари. Во мерките спаѓаат и забрана за одржување спортски и други манифестации на отворено, како и приспособување на времето за работа на работниците што работат на отворено во период од 11 до 17 часот.
Државниот инспекторат за животна средина има обврска да ги зајакне контролите на капацитетите кои подлежат на А-интегрирана дозвола, исто како и општинските инспекции на капацитетите со Б-интегрирана дозвола. Институциите треба да дадат препорака за намалување на капацитетот на производство до 50 проценти, освен инсталациите кои произведуваат топлинска или електрична енергија. Со вонредните мерки се опфатени и градежните компании кои треба редовно да ги измиваат градежните возила при излез од градилиштето, а транспортот на градежните возила и машини да се прави во 7:30 часот.
Со мерките им се наложува на сите органи на државната управа, агенциите, фондовите, бироата, заводите, јавните претпријатијата и АД во државна сопственост, како и на единиците на локална самоуправа да ја намалат до 50 проценти употребата на службените возила.
Министерство за труд и социјална политика, пак, во соработка со Црвениот крст, Здравствениот дом и единиците за локална самоуправа, треба да обезбеди прифатилишта за сместување на бездомници, да даде поддршка на стари осамени лица преку организирани посети.