Постојат повеќе причини за падот на цената на нафтата: порастот на инфекциите со коронавирус; одлуката на ОПЕК да остане на планот за зголемување на производството во јануари; како и разочарувачкиот извештај за вработеноста во САД, велат експертите
Цените на нафтата на светските берзи паднаа минатата недела, шести пат по ред, бидејќи трговците стравуваат дека варијантата омикрон на коронавирусот може да предизвика повторно затворање на економиите, а со тоа да дојде и до пад на побарувачката на нафта.
Цената на барелот на лондонската берза минатата недела падна за речиси четири отсто, на 69,88 долари, додека на американската барелот падна за 2,8 отсто, односно на 66,26 долари.
Ова е шеста недела по ред како цените паѓаат, што не е забележано од ноември 2018 година. Откако кон крајот на октомври достигна највисоки нивоа во последните три години, цената на нафтата се спушти за околу 18 отсто.
Падот на цените минатата недела се должи на ширењето на варијантата омикрон на коронавирусот во светот, која може да биде позаразна од претходните и отпорна на постојните вакцини.
Иако лекарите од Јужна Африка, каде што првпат се појави оваа варијанта, велат дека заразените луѓе немаат потешки симптоми од другите варијанти на вирусот, многу земји ги заоструваат граничните контроли.
Поради тоа, инвеститорите се плашат од повторно затворање на економиите, што би го забавило закрепнувањето од корона-кризата.
ОПЕК го зголемува производството
Цените на нафтата се под притисок и поради одлуката на Организацијата на земјите извознички на нафта (ОПЕК) и нејзините сојузници, предводени од Русија, да продолжат да го зголемуваат производството во јануари, според планираното, за 400 000 барели дневно, и покрај појавата на нови варијанти на коронавирусот.
Сепак, водечките светски производители на нафта не ја исклучуваат можноста за промена на политиките на краток рок доколку мерките со кои владите се обидуваат да го спречат ширењето на омикрон ѝ наштетат на побарувачката, па порачуваат дека би можеле повторно да се состанат пред почетокот на следната година.
„Има повеќе причини за падот на цената на нафтата, вклучувајќи го и порастот на инфекциите со коронавирус, одлуката на ОПЕК да остане на планот за зголемување на производството во јануари и разочарувачкиот извештај за вработеноста во САД“,
вели Боб Јавгер, директор за трговија со енергија во компанијата „Мизухо“.
Во петокот беше објавено дека бројот на вработени во САД минатиот месец се зголемил за 210 000, значително помалку од еден месец претходно и помалку од очекуваните 530 000 вработувања.
И тоа може да значи забавување на закрепнувањето на најголемата светска економија од корона-кризата. А тоа закрепнување би можело дополнително да се забави доколку американската централна банка наскоро ја заостри монетарната политика.
Во извештајот до Конгресот, претседателот на ФЕД, Џером Пауел, минатата недела рече дека повеќе не ја смета високата инфлација за привремена и дека поради тоа ФЕД ќе ги преиспита плановите за намалување на програмата за откуп на обврзници на следната седница на 14-15 декември.
Ова предизвика шпекулации на пазарот дека поради инфлацијата, која би можела да остане висока подолго од проценетото, ФЕД може да го забрза процесот на откажување на програмите за купување обврзници и потоа да ги зголеми клучните каматни стапки порано од очекуваното.