Обвинителката од Специјалното јавно обвинителство Ленче Ристоска, придружувана од колегите обвинители, порача дека постапките на поединци не смеат да го загрозат интегритетот на Oбвинителството. Ристоска се обрати во име на целиот персонал на СЈО. Кажа дека денеска нема стапено во контакт со Катица Јанева, а за нејзината оставка, вработените во СЈО дознале во исто време кога таа се објави во јавноста.
„Денес не стојам овде само во лично име. Стојам во име на сите присутни обвинители, а и на Рустеми, Донев и Фетаи кои се на годишен одмор. Стојам и во име на целиот истражителски тим на СЈО и на стручната служба. Сакам да Ве уверам сите дека наш примарен интерес е зачувување на интегритетот и дека секогаш како вработени сме постапувале согласно законските прописи и сме се труделе да бидеме на ниво на задачата. Ние стоиме зад работата која сме ја завршиле досега. Ве уверувам дека сите постапки не се доведени до прашање од причина што нашите постапувања во нив биле во рамки на законските прописи. Сакам да Ве информирам дека ние внимателно ги следиме случувањата и, се разбира, дека изразуваме голема загриженост, но сепак апелираме да се почитува презумпцијата на невиност. Сакам да потенцирам дека се придружуваме на повикот на републичкиот јавен обвинител – секое лице да пријави криминални активности, очекуваме ваквите активности да се истражат“,
изјави Ленче Ристоска – обвинителка во СЈО.
Ристоска порача дека се отворени за соработка со колегите од Обвинителството за гонење организиран криминал.
„Уште еднаш би сакала да потенцирам, сите сомненија кои инволвираат поединци не смеат да го загрозат интегритет во постапките. Работата на СЈО останува. Верувам дека во иднина ќе имаме осудителни пресуди. Дејствијата на поединци не ги карактеризираат дејствијата на целата институција. СЈО е институција во која работат и обвинители и истражители со висок интегритет“,
рече Ристоска.
Дополнителни детали обвинителката Ристоска кажа дека не смее да соопшти со оглед на тоа што во тек е истражна постапка.
„За тој што се огрешил пред законот, одговорност мора да има. Сите се еднакви пред Уставот и законите и не ретерираме, затоа сме тука, да покажеме, да се најде доколку постои одговорност, но мора да ги почитуваме постапките и презумпцијата на невиност и длабоко веруваме дека интегритетот на обвинителството нема да биде загрозен“,
рече Ристоска.
Од Основното јавно обвинителство вчера за „360 Степени“ потврдија дека при синоќешните претреси за случајот „Рекет“ одземен е мобилниот телефон на шефицата на СЈО, Катица Јанева.
Претресите следуваат откако Јавното обвинителство за гонење организиран криминал и корупција отвори истрага за трговија со влијание и за перење пари. Во 30-дневен притвор синоќа завршија осомничените Бојан Јовановски, познат како Боки 13, и Зоран Милевски, познат како Зоки Кичеец. Според Обвинителството, тие барале рекет од 8 милиони евра, ветувајќи прекин на истражна постапка или олеснителни околности, повикувајќи се на блиски релации со јавен обвинител. Како што објави „360 Степени“, според неофицијални но добро упатени извори, за рекетот користено е СЈО, а осомничените „тргувале со влијание“ за случајот „Империја“.
Пред да биде обелоденета истрагата и речиси истовремено со приведувањата на осомничените, Катица Јанева вчера поднесе оставка од функцијата.
Јанева засега не е дел од листата на осомничени за случајот „Рекет“, а во денешното соопштение на Јавното обвинителство за гонење организиран криминал и корупција, кое се однесува на синоќешните претреси, нема ниту збор за одземениот мобилен на Јанева.