Министерот Османи очекува до средината на јануари, откако ќе биде избран новиот владин кабинет, да се комплетира дипломатската мрежа на земјава, но посочува и на тешкотии во комуникацијата со собраниската Комисија за надворешни работи, како последен „филтер“ за пополнување на амбасадорските позиции
Министерот за надворешни работи Бујар Османи очекува до средината на јануари да бидат пополнети сите испразнети амбасадорски места на земјава. Решенијата за овие амбасадорски места се надева дека ќе бидат готови веднаш по формирањето на новата влада.
„Секоја амбасада е важна сама по себе, меѓутоа очекувам во наредниот период да го заокружиме целиот процес за да не оставиме ниту една амбасада без амбасадор. И на прес-конференцијата, кога зборував за историски најголемиот буџет на МНР, реков дека амбасадите ќе бидат значително пополнети со дипломати со цел навистина да ја ставиме во функција нашата дипломатска служба“,
рече Османи одговарајќи на новинарски прашања по прес-конференцијата со неговиот унгарски колега Петер Сијарто.
Напомена дека ќе бидат пополнети не само амбасадорското место во Софија, туку и сите други.
Најави дека деновиве треба да бидат пополнети амбасадорските места во Индија, Италија, Русија и Австрија. Новоименуваните амбасадори на овие позиции пред неколку месеци го поминаа последниот „филтер“, презентирајќи ги своите платформи пред собраниската Комисија за надворешни работи, чиј претседател е Антонио Милошоски од ВМРО-ДПМНЕ.
„Со ова завршивме уште четворица. Имајте предвид дека испративме повеќе од 10 амбасадори изминативе месеци. Значи веќе една голема група решивме, покрај целата тешкотија што ја имавме во комуникацијата со Комисијата за надворешна политика и Милошоски кој го одложуваше процесот целиот период“,
рече Османи.
И претседателот на државата Стево Пендаровски во четвртокот изрази надеж дека наскоро ќе бидат пополнети испразнетите амбасадорски места. До него, како што изјави, не се пристигнати нови предлози од Владата.
„До овој момент, предлози од Владата до мене нема. Зошто е тоа така, претпоставувам во еден дел заради изборите и постизборните турбуленции“,
истакна Пендаровски во четвртокот на гостувањето во емисијата „Топ тема“ на телевизија Телма.
Претходната влада на Зоран Заев, кон крајот на 2019 година, утврди листа со дваесетина имиња за нови амбасадори во мисиите на земјава кои се испразнети подолго време. Со оглед на тоа што следуваа предвремените парламентарни избори во 2020 година, предлозите останаа на хартија до формирањето на новата влада на СДСМ и на ДУИ. Но и во изминатата една и пол година, имаше застој во испраќањето на новите амбасадори, главно, во последната фаза – во матичната собраниска комисија. Таму е „заглавен“ и предлогот универзитетскиот професор Љубомир Фрчкоски да биде македонски амбасадор во седиштето на Обединетите нации во Њујорк, кој стигна во Собранието.