Неговата денешна реакција на Фејсбук доаѓа откако вчера претседателот на Собранието Талат Џафери соопшти дека во парламентот стигнало известување од Министерството за надворешни работи (МНР) дека Фрчковски ќе биде амбасадор на Северна Македонија во седиштето на ООН во Њујорк
Како претседател на Комисијата за надворешна политика тој најавува дека, согласно Деловникот, ќе вложи максимални напори во Њујорк да не дозволи да нè претставува амбасадор кој бил оценет за непожелен од страна на САД, како земја домаќин на ООН
„360 степени“ во март годинава објави дека Фрчкоски ќе замине на амбасадорска позиција во Њујорк откако претходно информациите беа дека тој ќе се пресели во Вашингтон како амбасадор на земјава во Соединетите Американски Држави. Меѓутоа, тогаш надлежните институции ја прекинаа постапката за негово назначување за амбасадор во САД по кампањата што против него ја поведе Обединета македонска дијаспора (ОМД)
Пратеникот од ВМРО-ДПМНЕ и поранешен министер за надворешни работи, Антонијо Милошоски, најавува дека како претседател на Комисијата за надворешна политика, како што вели, ќе вложи максимални напори во Њујорк да не дозволи да нè претставува Љубомир Фрчкоски.
Тој тврди дека Љубомир Фрчкоски не може да биде амбасадор во ОН. Неговата денешна реакција на Фејсбук доаѓа откако вчера претседателот на Собранието Талат Џафери соопшти дека во парламентот стигнало известување од Министерството за надворешни работи (МНР) дека Фрчкоски ќе биде амбасадор на Северна Македонија во седиштето на ООН во Њујорк.
„Во дипломатијата кандидат за амбасадор, кој не добил агреман од Вашингтон, по автоматизам се подразбира дека е неупотреблив како дипломат на територијата на САД. Итроштините на Заев малку да го задоволи егото на клиентот, а малку да го ублажи срамот пред американците, па Фрчкоски да го седне во амбасадорското столче на Ист Ривер, се провидни, бидејќи седиштето на ОН, сепак, е во Њујорк, на територијата на Америка. Дополнително, САД се една од петте постојани членки на Советот за безбедност на ОН и амбасадор кој бил непожелен во Вашингтон ќе има и сериозен хендикеп во дипломатската активност во Њујорк. Во ООН постои и дипломатски НАТО-клуб каде што амбасадорите на земјите членки имаат редовна координација, а со персона како Фрчкоски и овој битен дипломатски кружок би останал неискористен“,
напиша утрово Милошоски.
Понатаму во објавата тој тврди дека од она што во МНР го има како архивска меморија преку дописите од мисијата на Македонија при ООН, од 1993 година до денес, „не е забележан случај амбасадор на која било држава, кој бил одбиен за агреман во Вашингтон, потоа да биде испратен за амбасадор во Обединетите нации“.
„Ниту држави како Танзанија, која е хибриден режим, не си дозволуваат вакви дипломатски екскурзии во односите со САД. Очигледно, МНР Османи одбрал да не биде коректив на лошата одлука на Заев, после одбивањето од Вашингтон, Фрчкоски да биде номиниран за амбасадор во Обединетите Нации. Но, кога владата и МНР носат лоши решенија за угледот на македонската дипломатија, тогаш должност на Собранието е да биде коректив на извршната власт. Затоа, согласно Деловникот, како претседател на Комисијата за надворешна политика, ќе вложам максимални напори во Њујорк да не дозволиме да не’ претставува амбасадор кој бил оценет за непожелен од страна на САД, како земја домаќин на ООН“,
напиша Милошоски.
„360 степени“ во март годинава објави дека Фрчкоски ќе замине на амбасадорска позиција во Њујорк откако претходно информациите беа дека тој ќе се пресели во Вашингтон како амбасадор на земјава во Соединетите Американски Држави. Меѓутоа, тогаш надлежните институции ја прекинаа постапката за негово назначување за амбасадор во САД по кампањата што против него ја поведе Обединета македонска дијаспора (ОМД).
За разлика од процедурата за именување амбасадор во одредена држава, која подразбира добивање агреман (одобрение, согласност од една држава за прифаќање дипломатски претставник од друга држава), за назначување шеф на мисија во мултилатерална меѓународна организација, каква што се Обединетите нации, не е потребна претходна согласност од организацијата домаќин.
Милошоски во денешната објава на Фејсбук вели дека тоа што земјава три години нема амбасадор во САД е доказ за тоа колку ни е лошо организирана дипломатијата.
„Американската дипломатска кота е празна заради личните пазарења на премиерот со амбасадорските позиции, во случајов компензација од Заев кон Фрчкоски, како оддолжување за неговиот придонес кон „ликот и делото” на премиерот. Таквото тргување со амбасадорската позиција во САД не доведе до понижувачка ситуација во март оваа година, кога висок претставник на Стејт Департментот лично му се јавил на Заев со став дека Вашингтон нема да даде согласност за владината одлука за номинација на Фрчкоски за амбасадор во Америка. Во присуство на уште еден државен функционер, Заев, за лошиот амбасадорски избор морал да се правда на уште полош англиски“,
напиша Милошоски.