„Ако ги погледнеме сите оние (учесници н.з.) низ градовите кај што има протести на пензионерите, ќе ги видиме во иницијативи, во одбори, родители на високи функционери во ДПМНЕ или, пак, и самите се членови на телата во партијта. Тоа укажува дека не се самоорганизирани, не е спонтана реакција на пензионерите, туку дека зад овие протести стои токму ДПМНЕ сè со цел да направат хаос во општеството“, изјави министерката во разговор за утринската програма на МТВ
Таа најави дека денеска ќе има состанок со Сојузот на пензионери, кој, како што посочи, е легитимно тело кое се грижи за 330 000 пензионери и со кое досега биле договорени сите мерки низ дијалог и флексибилност од двете страни. Инаку, на вчерашниот протест пензионерите, меѓу другото, побараа и укинување на Сојузот на пензионери
Според министерката за труд и социјална политика и претседателка на форумот на жени на СДСМ, Јованка Тренчевска, протестите на пензионерите не се спонтани и самоорганизирани, туку зад нив стои опозициската ВМРО-ДПМНЕ.
Целта, како што вели Тренчевска, е да се направи хаос во општеството.
Овие тврдења таа ги изнесе во разговор за утринската програма на Националната телевизија МРТВ, говорејќи за една од најактулените теми деновиве, која директно го засега ресорот со кој раководи.
„Ако ги погледнеме сите оние (учесници н.з.) низ градовите кај што има протести на пензионерите, ќе ги видиме во иницијативи, во одбори, родители на високи функционери во ДПМНЕ или, пак, и самите се членови на телата во партијта. Тоа укажува дека не се самоорганизирани, не е спонтана реакција на пензионерите, туку дека зад овие протести стои токму ДПМНЕ сè со цел да направат хаос во општеството, како што и впрочем години наназад работат да направат хаос во државата“,
рече Тренчевска.
Говорејќи во тој контекст, таа истакна дека со дијалогот во 2022 година веќе е воспоставено системско решение за постојан раст на пензиите. Станува збор за, како што посочи, нова методологија која го следи растот на инфлацијата, на трошоците за живот и растот на просечната плата.
„Тоа е систем којшто значи постојан раст на пензиите два пати во годината, секој март и септември“,
рече Тренчевска, додавајќи дека од воспоставувањето на методологијата пензиите се покачени за 24 отсто.
Министерката воедно најави дека денеска ќе има состанок со Сојузот на пензионери, кој, како што посочи, е легитимно тело кое се грижи за 330 000 пензионери и со кое досега биле договоени сите мерки низ дијалог и флексибилност од двете страни.
Таа се наврати и на барањата што вчера ги доставија пензионерите кои излегоа на протестот во Скопје. Двете клучни се линеарно зголемување од 3 500 денари што треба да влезат во основицата за сите 330 000 пензионери и минималната пензија да биде 18 000 денари.
Министерката, во контекст на ова ги повтори своите образложенија, кои ги изнесе и вчера, дека барањата на пензинерите кои протестираат се неуставни и неправедни.
„Прво, се поставува прашањето дали линеарното зголемување е уставна категорија, дали 18 000 минимална пензија е праведно за сите пензионери? Ако имаме предвид дека најголем дел од пензионерите кои во моментот имаат минимална пензија, имаат 15, 16, 17 години стаж, а имаме и пензионери кои имаат 30, 40 години стаж, кои можеби биле исто така на минимална плата и немаат висока пензија, некаде 20 000 денари. Дали за нив е фер нивниот влог во пензискиот фонд од 40 години да го изедначиме со оној на оние кои имаат 15 години контрибуција во пензискиот фонд“,
вели Тренчевска.
Таа додаде и дека со евентуално зголемување на пензиите за 3 500 денари, фискалните импликации за државата би биле големи. Тоа, според министерката, би довело од преоптоварување на Фондот за пензинско осигурување и во прашање би ја довело стабилноста на целиот пензиски систем.
„Ако сме популисти, а не сме како Влада, ние веднаш можеме да го направиме тоа, да не водиме сметка за сите 330 000 пензионери, да кажеме да, еве одредена група на пензионери ќе бидат задоволени и после четири месеци ниту еден пензионер да не зема пензија затоа што фондот не може да го издржи ова финансиско оптеретување“,
вели министерката за труд и социјална политика.
Вчера претпладне пензионерите на протест, кој се одржа во Скопје, побараа усогласување на пензиите согласно објавените податоци од Државниот завод за статистика во ноември 2021 година, линеарно зголемување од 3 500 денари на основицата на пензијата и минималната пензија да биде 18 000 денари, како и веднаш да се укине Сојузот на здруженија на пензионери.
Како што истакнаа на протестот, Сојузот не ги застапува интересите на пензионерите и затоа побараа да се укине членарината од 30 денари, а средствата за солидарен погреб од 150 денари месечно, наместо во Сојузот, да се плаќаат во Фондот за пензиско и инвалидско осигурување.
Изминатиот период, пензионерите протестираа во своите градови изразувајќи незадоволство од процентуалното зголемување на пензиите.