„Предлогот што е даден во Собранието не ја утврдува горната граница. Затоа разговараме со предлагачите на Законот во Собранието, со пратениците, за да се утврди горната граница. Да се знае колку најмногу може. Разговаравме и ќе видиме и уште ќе разговараме. Секако ќе се донесе закон кој ќе ги штити правата на работниците“, рече министерката за труд и социјална политика во интервју за „Топ тема“ на ТВ Телма
Дали ќе работат дополнителни часови, работниците ќе одлучуваат самите со потпишување на работните договори. Дополнителните часови, рече таа, ќе им бидат платени
Ќе се прават измени на веќе предложените измени на Законот за работни односи, кои се веќе во собраниска процедура, а се однесуваат на прекувремената работа на работниците кои ќе бидат ангажирани на изведбата на автопатите на дел од коридорите 8 и 10-д што ќе ги гради американско-турскиот конзорциум „Бехтел и Енка“.
Во подготовката на законските одредби ќе се вклучи Министерството за труд и социјална политика, а како што најави ресорната министерка Јованка Тренчевска во вечерашното гостување во „Топ тема“ на ТВ Телма, ќе се утврдува горна граница за прекувремениот ангажман на работниците кои ќе работат на автопатиштата.
Измените на Законот за работни односи се дел од пакетот од осум закони кои се најдоа во собраниска процедура по скратена постапка, а беа предложени од пратеници на владејачкото мнозинство.
„Пратениците го поднесоа законот, а сега по реакциите сите се вклучуваме за да ги заштитиме работничките права“,
рече министерката за труд и социјална политика Јованка Тренчевска.
Причината поради која Владата, односно Министерството за труд и социјална политика, разговара за интервенција во измените е тоа што со сегашниот предлог не се утврдува горна граница на прекувремени работни часови во кои може да бидат ангажирани работниците.
Затоа, како што рече таа, се разговара со предлагачите на измените, односно со пратениците, за се утврди горната граница.
„Предлогот што е даден во Собранието не ја утврдува горната граница. Затоа разговараме со предлагачите на законот во Собранието, со пратениците, за да се утврди горната граница. Да се знае колку најмногу може. Разговаравме и ќе видиме и уште ќе разговараме. Секако, ќе се донесе закон кој ќе ги штити правата на работниците“,
рече Тренчевска.
Дали ќе работат прекувремени часови, работниците ќе одлучуваат самите со потпишување на работните договори. Дополнителните часови, рече таа, ќе им бидат платени.
„Оној работник кој сака да работи и прекувремено да му биде исплатено прекувременото, а сепак да биде во рамки на Законот. Ако сакаме брзо да градиме, ако сакаме да изградиме за пократок временски период, треба да има прекувремена работа, но што е најважно, прекувремената работа ќе биде платена и секој работник ќе си даде писмена согласност, ќе потпише дека сака да работи прекувремено. Без писмена согласност на работникот, никој не може да работи повеќе од она што е во моментов во Законот за работни односи“,
кажа министерката.
Таа рече дека работната недела е 40 часа и оти Владата никаде не вели дека ќе биде 60 часа, туку се дозволува прекувремената работа да биде повеќе од осум часа неделно зависно од процесот на работа.
Според министерката, јавноста била изманипулирана со информациите дека сите работници кои ќе бидат ангажирани на коридорите 8 и 10-д ќе работат 60 часа неделно.
Прашана за коментар на критиките од синдикатите дека не биле консултирани за измените на Законот за работни односи, министерката Тренчевска рече дека изградбата на автопатиштата од „Бехтел и Енка“ е стратегиски проект кој е од исклучително значење за развојот на целото општество.
Инаку, предлог-измените на Законот за работни односи се заглавени во Собранието, конкретно во Комисијата за труд и социјална политика поради огромниот број амандмани поднесени од пратеници на ВМРО-ДПМНЕ и на Левица. Само Левица има поднесено 1 111 амандмани на измените.
Во анализата за измените на законите што ги предложија пратениците, конкретно во Законот за работни односи што неодамна ја објави „360 степени“, беше антиципирано дека предлагачите не предвиделе колку ќе биде новата граница за прекувремена работа.
Имено, со предлогот се бара измена на членот 117, односно по ставот 7 да се додаде нов став, 8, кој гласи:
„(8) По исклучок од ставовите (1), (2) и (7) на овој член прекувремената работа може да трае и подолго од осум часа во текот на една недела, повеќе од осум часа во просек неделно во период од три месеци и повеќе од 190 часа годишно во случаите кога се работи за работи од национален и стратешки интерес за државата, по претходно дадена писмена согласност на работникот.“
Ова значи дека пратениците предлагаат прекувремената работа на работниците во случаите кои се од национален и стратегиски интерес, како што е проектот „Бехтел и Енка“, да може да трае подолго од пропишаните осум часа во текот на една недела, повеќе од осум часа во просек неделно во период од три месеци и повеќе од 190 часа годишно. Истовремено, не кажуваат колку е новата граница за прекувремена работа, што значи дека нема ограничување колку часови прекувремено може да работи еден работник.
Премиерот Димитар Ковачевски, вчера и денеска одговарајќи на новинарски прашања на оваа тема, рече дека и со актуелното законско решение може да се работи повеќе од 40 часа неделно.
„Ние имаме закони кои важат. Доколку се донесат законски решенија кои ќе предвидат други услови за работа, тогаш ќе се аплицираат тие други услови. Инаку, и сега кај нас согласно законските решенија може да се работи повеќе од 40 часа, односно 50 часа. Така што, има голем број работници кои работат и 50 часа, по свој избор и со своја согласност“,
рече Ковачевски одговарајќи на новинарско прашање при денешниот увид на градежните активности за изградба на социјална зграда во Бутел.