Американскиот републикански претседател најави голема прослава за изборната победа што ја прогласи
Бајден го обвини Трамп за „гол обид за одземање на демократските права на американските граѓани“ и за преседан во историјата на САД
Кандидатот на републиканците за претседател Доналд Трамп и се обрати на јавноста од Белата куќа прогласувајќи победа на изборите, иако изборната комисија не ги преброи сите гласови.
„Искрено, победивме, иако не се преброени сите гласови. Му благодарам на американскиот народ за големата поддршка. Милиони луѓе гласаа за нас. Но, една многу тажна група на луѓе се обидува да им го одземе тоа право, што нема да дозволиме. Се подготвувавме за голема прослава“,
рече Трамп.
Тој додаде дека ќе побара од Врховниот суд пребројувањето на сите гласови да се запре „затоа што е очигледно дека републиканците водат во преостанатите неколку држави и дека Бајден и демократите не можат да ги стигнат“.
Бајден: Обид за одземање на демократските права на граѓаните
Ваквиот став на Трамп, од кампањата на Бајден го оценија како „навредлив, невиден досега и неточен“.
Тој го обвини Трамп за „гол обид за одземање на демократските права на американските граѓани“.
„Никогаш порано во нашата историја, претседател на Соединетите држави не се обидел да им го одземе гласот на Американците на националните избори. Охрабрувајќи ги напорите на Републиканците во повеќе држави да спречат законско пребројување на овие гласачки ливчиња пред денот на изборите, сега Доналд Трамп вели дека овие гласачки ливчиња не можат да се бројат ниту по денот на изборите“,
се вели во соопштението од кампањата на Бајден
Кампањата на Бајден додаде дека тие имаат правни тимови кои ќе се спротивстават на секој обид на Трамп да започне судска постапка во врска со пребројувањето на гласовите.
Претходно, тој ги повика приврзаниците да веруваат во победа и да ги почекаат конечните резултати во одлучувачките држави.
„Можеби ќе потрае малку подолго. Мора да бидеме трпеливи, сè додека не заврши напорната работа на броење гласови … Да почекаме да се избројат сите гласачки ливчиња“,
им порача Бајден на поддржувачите во Делавер.
Изјавата на Бајден следи откако, и покрај надежите, во клучните држави како Аризона, Џорџија, Северна Каролина и Висконсин во кои тој се надеваше дека ќе успее да обезбеди пресврт и да ги освои, резултатите се многу тесни или во полза на Трамп.
И во други две држави за кои тој се надеваше на пресврт – Мичиген и Пенсилванија – ќе се чекаат резултатите од гласовите пристигнати по пошта и од превременото гласање за да се одреди победникот.
Тоа значи дека продолжува интензивната пресметка меѓу двајцата кандидати, со тоа што Трамп се бори да избегне, по многу децении пракса со два мандати, да стане првиот претседател со само еден мандат.
Претходна вест: