Американскиот претседател ја критикуваше СЗО дека не ја исполнила својата должност во спречување на пандемијата со коронавирусот со тоа што застанала зад кинеските дезинформации за болеста
Американскиот претседател Доналд Трамп денеска соопшти дека побарал од администрацијата привремено да го запре финансирањето на Светската здравствена организација поради начинот на кој таа ја менаџираше пандемијата на коронавирусот.
На прес-конференција во Белата куќа, Трамп кажа дека СЗО не ја исполнила својата основна должност и дека за тоа мора да одговара, пренесуваат медиумите.
Тој ја обвини СЗО дека промовира „кинески дезинформации“ за коронавирусот, што, како што оцени, веројатно доведе до поголема епидемија отколку што би било случај доколку била пообјективна кон податоците што доаѓаа од Пекинг.
Генералниот секретар на ОН, Антонио Гутереш, го повика Трамп да не го прекинува финансирањето на СЗО истакнувајќи дека сега не е време за тоа.
„Сега е време за единство, за соработка во меѓународната заедница, време е за солидарна заедничка работа и борба против вирусот и последиците од пандемијата“,
апелираше Гутереш.
Трамп првично ја критикуваше СЗО дека е премногу „ориентирана кон Кина“ и најави дека ќе ги суспендира финансиските средства што Вашингтон ги одвојува за СЗО.
Претседателот на САД неколку дена подоцна упати и директна критика и кон директорот на СЗО дека ја политизира кризата со коронавирусот.
*Поврзана вест
Политико: Ковид-19 и критиките на Трамп – каде погрешија Кина и СЗО?