„Ќе го намалиме (бројот на војници) за многу, и го намалуваме за многу повеќе од 5 000“, изјави Трамп во разговор со новинарите, прашан за одлуката на Пентагон за намалувањето на бројот на американски војници стационирани во Германија
Сенаторот Роџер Викер и членот на Преставничкиот дом, Мајк Роџерс, кои претседаваат со комисиите во двата дома на Конгресот за воени прашања и кои доаѓаат од редовите на републиканците, во заедничка изјава предупредија дека потегот на Пентагон може да испрати погрешен сигнал до рускиот претседател Владимир Путин. Во изјавата тие наведуваат и дека секое намалување на трупите надвор од САД треба да биде направено во координација со Конгресот и сојузниците
Претседателот на Соединетите Американски Држави (САД), Доналд Трамп, изјави дека ќе го намали бројот на американски војници во Германија за многу повеќе од 5 000, откако неговите односи со трансатлантските партнери, особено со германскиот канцелар Фридрих Мерц, се влошија поради војната со Иран, објави денеска АФП.
Одлуката за намалување на бројот на американски војници во Германија за 5 000 припадници, Пентагон ја објави во петокот, додека вчера Трамп во разговор со новинарите изјави дека намалувањето ќе биде за многу повеќе од наведената бројка од Министерството за одбрана на САД.
„Ќе го намалиме (бројот на војници) за многу, и го намалуваме за многу повеќе од 5 000“,
изјави Трамп.
Тој, како што пренесоа медиумите, не даде повеќе детали за овие негови наводи.
Потегот Пентагон го повлече откако германскиот канцелар Фридрих Мерц во обраќање пред студенти оваа недела упати критики кон САД во однос на војната со Иран и неуспешните преговори, наведувајќи, меѓу другото, дека Техеран го понижил Вашингтон на преговарачката маса.
Портпаролот на Пентагон, Шон Парнел, во врска со најавеното повлекување на 5 000 американски војници од Германија наведе дека тоа треба да биде завршено во следните шест до 12 месеци.
Вчера се огласи и портпаролката на НАТО, Алисон Харт, која на социјалните платформи соопшти дека Северноатлантската алијанса работи со Соединетите Држави во насока да ги разбере деталите на одлуката за повлекување на силите.
„Ова прилагодување ја нагласува потребата Европа да продолжи да инвестира повеќе во одбраната и да преземе поголема одговорност за заедничката безбедност“,
напиша таа на социјалната платформа Икс.
Според медиумските извештати, заклучно со крајот на 2025 година, САД имаат 36 346 активни воени лица во Германија, 12 662 во Италија и 3 814 во Шпанија.
Германскиот министер за одбрана Борис Писториус вчера изјави дека повлекувањето на дел од американските трупи од Европа, вкучително и од Германија, било очекувано.
Инаку, одлуката за повлекување на трупите дојде во исто време кога Трамп најави зголемување на царините за возила од Европската Унија од 15 на 25 проценти од следната недела, обвинувајќи ја Унијата дека не се придржува до трговскиот договор потпишан минатото лето.
Загриженоста на републиканците
Одлуката на Пентагон во меѓувреме предизвика загриженост и кај дел од републиканците, политичката сила која стои зад актуелниот американски претседател.
Сенаторот Роџер Викер и членот на Преставничкиот дом, Мајк Роџерс, кои претседаваат со комисиите во двата дома на Конгресот за воени прашања и кои доаѓаат од редовите на републиканците, во заедничка изјава предупредија дека потегот на Пентагон може да испрати погрешен сигнал до рускиот претседател Владимир Путин.
Според нив, иако европските сојузници ги зголемуваат трошоците за одбрана, ќе биде потребно време тие инвестиции да се рефлектираат на воените капацитети за преземање одговорност за конвенционален одговор на потенцијална воена закана.
Двајцата, во заедничката изјава, исто така наведуваат дека Германија позитивно одговорила на повикот на Трамп за поголеми трошоци за одбрана и им дозволила на американските авиони да ги користат германските бази и воздушниот простор за време на тековниот конфликт со Иран.
„Германија со силни заложби одговори на повикот на претседателот Трамп за поголема распределба на товарот, значително зголемување на трошоците за одбрана и обезбедување непречен пристап и прелети за американските сили во поддршка на операцијата ‘Епски бес’ (воено име за кампањата на САД против Иран)“,
велат тие, пренесе „Гардијан“.
Во изјавата тие наведуваат и дека секое намалување на трупите надвор од САД треба да биде направено во координација со Конгресот и сојузниците.
„Тие сојузници таму направија значителни инвестиции за да бидат домаќини на американски трупи, намалувајќи ги трошоците за американските даночни обврзници, а воедно ја зајакнуваат првата линија на НАТО за да помогнат во спречувањето многу поскап конфликт од самиот почеток“,
велат сенаторот од Мисисипи, Викер, и членот на Претставничкиот дом од Алабама, Роџерс.
Инаку, Трамп се закани дека ќе го намали бројот на американските војници во Германија и во други европски земји за време на двата негови мандати во Белата куќа, тврдејќи дека сака Европа да преземе поголема одговорност за сопствената одбрана наместо да се потпира на Вашингтон.
Сега се чини дека се обидува да ги казни сојузниците кои не го поддржаа во војната на Блискиот Исток или не придонесоа за мировните сили во клучниот Ормуски Теснец, кој силите на Техеран го затворија од почетокот на конфликтот, наведува АФП.