Во Вашингтон се шпекулира дека Трамп пред да ја напушти функцијата во јануари ќе ги смени и директорката на ЦИА, Џина Хаспел и директорот на ФБИ, Кристофер Вреј
Доналд Трамп го отпушти шефот на Агенцијата за безбедност на интернет и инфраструктура (ЦИСА), Крис Кребс, бидејќи се спротивставил во врска со неговите тврдења за изборна измама.
Трамп отказот на Кребс го образложи со „крајно неточни“ забелешки за безбедноста на гласањето. Додека Трамп одбива да ги прифати изборните резултати во САД и тврди дека се работи за „масовна“ измама со гласовите, Кребс, кој раководеше со Агенцијата што требаше да спречи надворешни влијание врз изборите, изјави дека гласањето на овие избори било „најбезбедно“ во историјата на САД.
Кребс е последниот разрешен функционер од американскиот претседател по неговиот пораз, по министерот за одбрана Марк Еспер, кој исто така се спротивстави на изјавите на Трамп.
Како и во случајот со претходните разрешувања, и Кребс, наводно, за отпуштањето дознал вчера од твитот на Трамп.
Кребс, кој претходно беше извршен директор на „Мајкрософт“, ја водеше Агенцијата од нејзиното основање пред две години, по наводното руско мешање во изборите во 2016 година.
Што го разлути Трамп?
Кребс, наводно, го предизвикал незадоволството кај Трамп со веб-страницата на ЦИСА, наречена „Контрола на шпекулациите“, на која се отфрлаат дезинформациите за изборите, од кои поголемиот дел беа пласирани од самиот Трамп.
Неколку часа пред да биде отпуштен, Кребс објави твит кој алудираше на тврдењата на Трамп дека машините за гласање во различни држави ги префрлиле гласовите за Бајден.
„Во врска со обвинувањата дека се изманипулирани изборните системи, сите 59 експерти за изборна безбедност се согласуваат дека овие тврдења или биле неиздржани или се технички некохерентни. # Заштитете2020″,
напиша Кребс.
Овој, но и претходните објави на Кребс од крајот на јули оваа година, веќе не постојат на неговиот профил на Твитер.
Кребс неодамна реобјави и твит на експерт за изборно право во која се вели: „Ве молам, не ширете ги неоснованите тврдења за гласачките машини, дури и ако тие доаѓаат од претседателот”.
Отпуштањето на Кребс предизвика револт кај демократите. Портпаролот на новоизбраниот претседател Бајден рече „Крис Кребс треба да биде пофален за неговата работа во заштитата на нашите избори, а не да биде отпуштен затоа што ја кажа вистината“.
Во Вашингтон се шпекулира дека Трамп пред да ја напушти функцијата во јануари ќе ги смени и директорката на ЦИА, Џина Хаспел и директорот на ФБИ, Кристофер Вреј.