Тошковски рече дека иако не ги видел и слушнал изјавите на неговиот колега, сепак, според него, тие се несериозни и непрофесионални
Министерот за внатрешни работи во техничката влада Панче Тошковски денеска застана зад апелот на Јавното обвинителство и побара да не се споделуваат чувствителни информации во врска со убиството на 67-годишниот лекар чие безживотно тело со повеќе убодни рани пред две недели беше пронајдено во автомобил паркиран во близина на поликлиниката „Железара“.
Апелот на министерот Тошковски и на Јавното Обвинителство доаѓа откако денеска дополнителниот заменик-министер за внатрешни работи во техничката влада Митко Бојмацалиев рече дека лекарот не бил убиен во автомобилот, туку на друго место, а неговото тело било донесено во возилото.
„Во целост ќе го поддржам апелот на Јавното обвинителство од страна на било која институција што е вклучена во рамки на нејзините надлежности за расветлување на овој случај да не навлегува во детали кои би можеле да ја згрозат кривичната истрага“,
рече Тошковски денеска одговарајќи на новинарски прашања.
Тошковски рече дека иако не ги видел и слушнал изјавите на неговиот колега, сепак, според него, тие се несериозни и непрофесионални.
„Несериозни и непрофесионални изјави, ако е така како што велите, ако било така кажано од страна на кој било функционер, можам слободно да кажам дека станува збор за несериозна и непрофесионална изјава“,
рече Тошковски.
Повеќе детали во врска со овој случај, Тошковски рече дека не би можел да сподели затоа што, како што рече, се преземаат дејствија од страна на Министерството.
Дополнителниот заменик-министер за внатрешни работи во техничката влада Митко Бојмацалиев денеска изнесувајќи ги информациите дека рече лекарот не бил убиен во автомобилот, туку на друго место, а неговото тело било донесено во возилото не сакаше да открива повеќе детали во врска со новите сознанија за, како што рече, да не ја наруши истрагата која и натаму е во тек и во рамките на која полицијата сè уште работи и собира информации од терен.
Во врска со мотивите за убиството, односно дали тие се поврзани со професијата на жртвата или за нешто друго, дополнителниот заменик-министер изјави дека тие сè уште не се откриени до крај.
По ваквата негова изјава „360 степени“ испрати прашања до Јавното обвинителство од каде што побаравме одговор дали Основното јавно обвинителство Скопје може да ги потврди ваквите информации и доколку е тоа случај, врз основа на што е дојдено до овие сознанија – дали тоа го покажале наодите од обдукцијата, вештачењето на автомобилот или други докази собрани во текот на истрагата?
Од Обвинителството беа воздржани од споделување информации, а објаснувањето е дека сè уште не е откриен сторителот на кривичното дело.
Оттаму, воедно, апелираат и до другите институции во оваа фаза од постапката да се воздржат од изнесување информации од чувствителен карактер бидејќи сторителот сè уште не е откриен.
Безживотното тело на лекарот, како што соопштија тогаш од Министерството за внатрешни работи, беше пронајдено доцна вечерта на 21 март во неговиот автомобил, марка „киа“ на паркинг пред поликлиниката „Железара“. Според информациите на полицијата и на Јавното обвинителство на Република Северна Македонија, телото го пронашле членови на неговото потесно семејство кои тргнале да го бараат откако тој не се вратил дома од работа.