Според министерот, тоа лице ќе биде суспендирано од работа сè до донесување правосилна пресуда која ќе биде донесена во рамки на постапка, а најави и дека МВР во текот на овој ден ќе поднесе кривична пријава против ова лице за напад на друго службено лице
Одреден припадник на Министерството за внатрешни работи сторил насилство со кое ја погазил честа на службите во министерството, па и честа на Македонија како држава. Секој што се огрешил ќе одговара пред законот без разлика дали е љубител на десни или на леви. Оваа изјава денеска ја даде министерот за внатрешни работи во техничката влада Панче Тошковски на одбележувањето на Денот на Одделот за заштита на определени личности и објекти при Министерството за внатрешни работи прашан за настанот што се случи завчера вечер во кој, како што соопштија од МВР, полициски службеници од Единицата за недозволена трговија при СВР Скопје го лишиле од слобода И.Б.(43) од Скопје, полициски службеник кој не бил на должност, затоа што физички нападнал полициски службеник што извршувал службени дејствија.
Според министерот, тоа лице ќе биде суспендирано од работа сè до донесување правосилна пресуда која ќе биде донесена во рамки на постапка, а најави и дека МВР во текот на овој ден ќе поднесе кривична пријава против ова лице за напад на друго службено лице.
„Во овој случај со осуда излегов веднаш штом ја добив информацијата, особено што станува насилство од припадник на МВР. На разните шпекулации дека лицето попречувало одредена акција при нејзино спроведување, сакам да потенцирам дека тоа не е точно. Лицето кое сторило напад влегло во акција откако акцијата на службените лица во предметниот објект веќе била завршена. Ова го кажувам зашто гледам некои инсинуации, обиди за дефокус, обиди за манипулација“,
вели Тошковски.
Според него, оваа постапка во МВР ќе биде експресно завршена.
Инаку, вчера „360 степени“ објави дека членот на обезбедувањето на лидерот на ВМРО-ДПМНЕ, Христијан Мицкоски, Ивица Б., нападнал колега полицаец кој извршувал службени дејствија, а веднаш по нападот бил лишен од слобода.
Непотврдени информации велат дека полицијата во потрага по дрога сакала да изврши претрес во познат скопски локал, но дека Ивица Б., кој бил внатре во објектот, се обидел да ја спречи акцијата, по што е уапсен.
Дополнителниот заменик-министер за внатрешни работи Митко Бојмацалиев, кој доаѓа од редовите на СДСМ, на социјалните мрежи напиша дека македонската историја не памети ваков случај на поранешен полициски функционер да нападне и да спречи свој колега во извршување на службена дејност и побара максимално професионално да се расветли овој случај.