Советот на Општина Битола утре ќе одржи вонредна седница на која ќе биде донесена одлука за обезбедување средства од буџетот на Општината како донација за семејствата на настраданите во Турција и Сирија
Петмина припадници од тимот на Дирекцијата за заштита и спасување од Битола отпатуваа за Турција каде што ќе се вклучат во спасувачката мисија во подрачјата погодени од разорните земјотреси што вчера се случија во југоисточниот дел на земјата, а однесоа голем број жртви и во северозападна Сирија.
Општина Битола на својата официјална интернет-страница соопшти дека на иницијатива на градоначалникот Тони Коњановски и претседателката на Советот Габриела Илиевска утре Советот ќе одржи вонредна седница на која ќе биде донесена одлука за обезбедување средства од буџетот на Општината како донација за семејствата на настраданите во Турција и Сирија.
„Ова е само еден од начините со кои Општина Битола се обидува да обезбеди поддршка за населението во овие земји кои се соочуваат со тешки материјални и човечки загуби по катастрофалниот земјотрес. Пријателството помеѓу Битола и Турција се негува многу години, како со збратимениот град Бурса така и со други градови од оваа земја“,
се наведува во соопштението на Општина Битола.
Тимот од Дирекцијата за заштита и спасување, подрачна единица Битола, со пет члена се вклучи во спасувачката мисија во подрачјата погодени од земјотресот, се додава во соопштението.
Вчера градоначалникот на Струмица, Костадин Костадинов, во објава на својот фејсбук-профил информира дека осум пожарникари од Територијалната противпожарна единица (ТППЕ) Струмица ќе заминат во спасувачка мисија во турскиот регион погоден од катастрофата.
Како што посочува Костадинов, овие пожарникари се специјално обучени за вакви непогоди и имаат искуство од спасувачката акција по силниот земјотрес кој пред неколку години ја погоди Албанија.
Владата на вчерашната вонредна седница донесе сет одлуки и упати задолженија до дел од министерствата и институциите во земјава, во насока на обезбедување помош која итно ќе биде испратена во Турција.
Според владините одлуки, во Турција ќе бидат испратени 40 припадници на републичките сили за заштита и спасување кои ќе помогнат во санирањето на последиците од земјотресот, а заедно со нив ќе бидат испратени и две противпожарни возила.
Во санирањето на последиците од земјотресот, дополнително ќе бидат испратени и 24 припадници на Армијата, од кои 22 лица од Баталјонот за специјални сили, две кучиња за пребарување и две лица водачи на кучиња.
Апел до градоначалниците од сите општини во земјава вчера упати претседателот на Заедницата на единиците на локална самоуправа (ЗЕЛС), Орце Ѓорѓиевски, кој повика секоја од општините, во рамките на своите финансиските можности, да донира за погодените региони од разорните земјотреси во Турција и Сирија.