Ваквата информација денеска преку објава на Фејсбук ја соопшти градоначалникот на Струмица, Костадин Костадинов, кој вели дека овие пожарникари се специјално обучени за вакви непогоди и имаат искуство од спасувачката акција по силниот земјотрес кој пред неколку години ја погоди Албанија
Осум пожарникари од Територијалната противпожарна единица (ТППЕ) Струмица ќе заминат во спасувачка мисија во турскиот регион кој денеска во два наврати беше погоден од едни од најсилните земјотреси регистрирани во оваа земја во последните неколку децении.
Ваквата информација денеска преку објава на Фејсбук ја соопшти градоначалникот на Струмица, Костадин Костадинов, кој вели дека овие пожарникари се специјално обучени за вакви непогоди и имаат искуство од спасувачката акција по силниот земјотрес кој пред неколку години ја погоди Албанија.
„Струмица подава рака за погодените од катастрофалниот земјотрес во Турција. Осум пожарникари од ТППЕ Струмица, припадници на тимот за пребарување и спасување од урнатини, кој е во состав на републичките сили за заштита и спасување при Владата на Република Северна Македонија, ќе заминат во спасувачка мисија во пријателска Турција, со надеж и уверување дека ќе им помогнат на настраданите во земјотресот“,
пишува Костадинов на Фејсбук.
Во фејсбук-објавата Костадинов изрази сочувство до сите граѓани од Турција и од Сирија за големите човечки и материјални загуби и порача дека ваквите катастрофи укажуваат на немоќта на човештвото пред моќта на природата и нејзините законитости.
„Но, во исто време, таквите случувања даваат до знаење колку треба да бидеме хумани и одговорни пред големите предизвици, да бидеме луѓе за луѓето“,
додава градоначалникот на Струмица.
Денеска, во временски интервал помал од 12 часа, во Турција се случија два потреси со разорна магнитуда. Првиот земјотрес се случи во текот на ноќта додека луѓето спиеја, а беше со магнитуда од 7,8 степени, што го прави еден од најсилните земјотреси во регионот во изминатиот еден век. Вториот, со магнитуда од 7,7 степени според Рихтеровата скала, се случи во 13:24 часот по локално време.
Вкупниот биланс на жртви во земјотресот во Турција и во Сирија, чиј северозападен дел исто така се соочува со сериозен број на загинати од потресот во соседната земја, сега изнесува повеќе од 2.300 луѓе.