Хрватската амбасадорка не сака да коментира што би се случило доколку ЕУ и овој пат не испорача и не се одржат првите меѓувладини конференции со Северна Македонија и Албанија односно каква порака ќе се испрати до регионот и каков ќе биде кредибилитетот на Унијата, туку потенцира дека европската перспектива на Западен Балкан е несомнена
Северна Македонија спроведе бројни реформи, од кои некои навистина беа и болни. Затоа сметаме дека Северна Македонија заслужува отворање преговори колку што е можно побрзо. Би сакале тоа да се случи уште за време на португалското претседателство – да се одржи првата меѓувладина конференција, односно формалниот почеток на пристапните преговори, изјави во интервју за МИА амбасадорката на Хрватска во Северна Македонија, Нивес Тигањ.
Тигањ вели дека Хрватска го поттикнува и поддржува дијалогот меѓу Северна Македонија и Бугарија за изнаоѓање решение. Таа додава дека е потребно и продолжување на реформскиот процес и консензус на сите политички сили во државата.
„Тоа е многу важно, бидејќи таквиот пристап ја потврдува посветеноста на вашата земја за вашата стратегиска цел, а тоа е членство во Европската Унија. И Хрватска имаше билатерална пречка на својот евроинтеграциски пат, па морам да кажам дека апсолутно имавме еден политички консензус, сите политички субјекти во државата имаа јасна цел и јасно определување за членство во Европската Унија“,
вели хрватската амбасадорка.
Во интервјуто таа не сака да коментира што би се случило доколку ЕУ и овој пат не испорача и не се одржат првите меѓувладини конференции со Северна Македонија и Албанија односно каква порака ќе се испрати до регионот и каков ќе биде кредибилитетот на Унијата, туку потенцира дека европската перспектива на Западен Балкан е несомнена.
„Јас би се фокусирала на сегашните активности, на она сега што се случува, не би размислувала за некои негативни последици, ниту што би било кога би било. Она што е сега, морам да го кажам, тоа е факт, дека европската перспектива на земјите од Западен Балкан е несомнена. Ќе потсетам само на времето кога Хрватска претседаваше со Советот на ЕУ, кога испорачавме одлука и покрај пандемијата, кога испорачавме одлука за отворање преговори за Северна Македонија и Албанија. Ќе потсетам на силниот ангажман на германското претседателство, а и сега, како што и самите споменавте, португалското претседателство со Советот на ЕУ. Документот што минатата седмица е презентиран на Скопје и на Софија, токму со цел изнаоѓање решение во спорот меѓу вашата земја и Бугарија и со цел деблокада на европскиот пат на Македонија. Тоа се конкретни потези, конкретни активности на Европската Унија и целосно јасна цел на посветеноста на Европската Унија на земјите од Западен Балкан, односно на политиката на проширување на Западен Балкан“,
вели Тигањ во интервјуто за МИА.