Во третата ИЕ (Штип, Велес…) и во четвртата (Прилеп, Струмица…) е регистриран помал број гласачи од дозволеното и многу веројатно е дека состојбата ќе остане таква на изборите во април, со оглед на тоа што уште се чека Владата да ги достави до Собранието измените на Изборниот законик
Две од вкупно шест изборни единици (ИЕ), каде што ќе се гласа на 12 април, се со поголема бројка на гласачи од законски дозволениот лимит. Станува збор за втората ИЕ, во чиј состав се Куманово и неколку скопски општини, како и шестата ИЕ, која досега неколкупати беше „прекројувана“, а во чии „граници“ како најголеми градови влегуваат Тетово и Гостивар.
Наспроти тоа, во третата ИЕ (Штип, Велес…) и во четвтата (Прилеп, Струмица…) е регистриран помал број гласачи од дозволеното. Според тоа, „регуларни“ во однос на бројот на гласачи засега се само првата (скопска) ИЕ и „петката“, која ги опфаќа Битола, Охрид, Струга… Седмата изборна единица е дијаспората, каде што, исто така, и годинава ќе се спроведат избори, иако во 2016 година надвор од земјава не беше постигнат цензусот за освојување пратенички мандат.
Државната изборна комисија, како што информираа денеска оттаму, по добивањето на последното законско ажурирање на Избирачкиот список, на 1 декември 2019 година испратиле известувања до министерката за правда Рената Тренеска-Дескоска и до претседателот на Собранието Талат Џафери дека избирачите во втората и во шестата ИЕ го надминуваат дозволениот лимит од пет проценти. Од ДИК, исто така, информирале дека бројката на гласачите во третата и четвртата ИЕ е под законски дозволениот лимит.
Претседателот на ДИК, Оливер Дерковски, во изјава за МИА вели дека Изборниот законик во членот 175 ги утврдува границите на изборните единици и опфатот на местата и општините и според тоа се знае во каква постапка и кој е овластен во државата да предлага измени на закони.
„Тоа е Владата како овластен предлагач, пратеници или пратенички групи во Собранието. ДИК во оваа ситуација нема никаква надлежност. Комисијата по добивање на состојбата секој месец има обврска да ги известува надлежните за состојбата во Избирачкиот список, односно за она што е плус/минус 5 проценти надминување или ненадминување. И ДИК го прави тоа. Друго не може ништо да направи“,
вели Дерковски.
Според последното известување на ДИК, надминувањето во шестата ИЕ е 8,60 проценти, а во двојката 5,74 проценти. Помал број избирачи има во четвртата ИЕ и тоа 6,36 проценти и во третата за 7,64 проценти.
Иако гласачите се нерамномерно распределени, многу веројатно е дека изборните граници нема да се менуваат за претстојните избори, со оглед на тоа што станува збор за покомплексен процес која бара повеќе време. Освен тоа, иако деновите до распуштањето на овој пратенички состав се бројат на прсти, Владата сè уште го нема доставено во Собранието предлогот за измени на Изборниот законик, за што со месеци преговараат работни групи на власта и на опозицијата.
Од Министерството за правда за „360 степени“ велат дека има согласност од политичките партии за дел од препораките на ОБСЕ/ОДИХР, но дека ситуацијата се менува со барањето за измена на изборните единици. Како што велат од правда, од тоа дали ќе се постигне согласност околу ова барање и колку ќе се инсистира на тоа, зависи дали овие измени во Изборниот законик ќе стигнат во парламентот пред распишување на изборите.
Една од можностите за надминување на проблемот со нерамномерната распределба на гласачи во шесте изборни единици е воведување една изборна единица за парламентарни избори. Но и тој предлог – за промена на изборниот модел е блокиран во парламентот, откако беше поднесен од група пратеници од помалите парламентарни партии, заедно со предлог за воведување отворени листи за избор на општински советници на локални избори.