„Балансерот е нефункционално решение кое стана предмет за злоупотреба на Македонците, кои за да се вработат во јавна администрација се пишуваат Албанци. Затоа, неопходен е закон за правична застапеност кој ќе овозможува Албанците да бидат дел од сите институции врз основа на квалитет, интегритет, стручност“ се вели во реакцијата на „Вреди“
Застапеноста на Албанците никогаш нема да биде завршено прашање и најмалку ќе зависи од партија како ЗНАМ. Дневна политика од балансерот прават токму Минчев и Димитриевски, кои мислат дека нивната антиалбанска доктрина ќе ги направи голема партија. Ова е денешната реакција на коалицијата „Вреди“, составена од повеќе партии на Албанците, која е дел од владиниот состав заедно со ВМРО-ДПМНЕ и ЗНАМ, на изјавата на министерот за јавна администрација Горан Минчев од редовите на партијата на Максим Димитриевски дека темата за балансерот е завршена, архивирана и дека веќе се спроведува.
„Минчев и Димитриевски сè уште живеат во сопствените заблуди. Не живееме во 1997 година ниту, пак, тие се клучен фактор во Владата. Напротив. Наместо да пукаат со ќор-фишеци, треба да го научат ставот на ‘Вреди‘. Сметаме дека балансерот е нефункционално решение кое стана предмет за злоупотреба на Македонците, кои за да се вработат во јавна администрација се пишуваат Албанци. Затоа, неопходен е закон за правична застапеност кој ќе овозможува Албанците да бидат дел од сите институции врз основа на квалитет, интегритет, стручност“,
се вели во реакцијата од „Вреди“.
Минчев на денешната прес-конференција посочи дека со законското спроведување на балансерот нема намера да го провоцира коалицискиот партнер и оти се надева дека колегите од „Вреди“ ќе се вразумат, па ќе потрошат повеќе внимание на читање на постоечките закони и ќе се посветат на нивно спроведување и нема да се занимаваат со дневнополитички теми.
„Не постои ништо што е намерно. Или ќе се почитува закон или нема да се почитува закон. Јас како министер сум должен да го почитувам законот и тоа ќе го правам се додека сум на оваа функција. Стриктно е наведен членот за пресметката во балансерот дека се однесува исклучиво на резидентното население на територијата на Република Северна Македонија, односно сите жители кои живеат на територијата на Република Северна Македонија ќе бидат во формулата за пресметка на баленсерот“,
рече Минчев.
Минатата недела Минчев изјави дека од 120 годишни планови за вработување, 115 се вратени на доработка, поради погрешно впишан процент на етничка задница, т.е. неусогласеност со новиот начин на пресметка на балансерот.
Според новиот начин на пресметка на балансерот, предвид се зема само бројот на резидентното население, а не и на нерезидентното население од пописот во 2021.
И тогаш од коалицијата „Вреди“ остро реагираше на потегот на Минчев обвинувајќи дека кадрите на ЗНАМ имаат погрешна проценка дека ќе го создаваат својот политички идентитет на антиалбанска доктрина.
На одлуката на Минчев реагираше и претседателот на Алтернатива, Зеќирја Ибрахими, кој посочи дека за нив ЗНАМ воопшто не е важна партија, туку дека ЗНАМ е мала, периферна политичка партија, за која, како што вели, воопшто не е важно што ќе кажат. Според него, темите за кои зборува ЗНАМ не и наметнуваат никаква обврска на коалицијата „Вреди“.
Министерот за дигитална трансформација Стефан Андоновски во јуни најави дека се менуваат бројките во балансерот да одговараат на пописните резултати исклучиво на резидентното население од пописот во 2021 година. Тогаш посочи дека укинувањето на балансерот ќе оди во фази, но дека за оваа проблематика ќе биде потребна сеопфатна дискусија во рамките на владата, односно, како што рече, да се види кои се начините да не се повреди темелниот принцип на Уставот, како соодветна и правична застапеност на заедниците.
На почетокот на месецов, пак, првиот вицепремиер и министер за животна средина Изет Меџити изјави дека има заеднички заклучок оти балансерот не е во функција за тоа што бил воведен. Тој кажа дека со одлука ќе се унапреди во закон за правична застапеност и запазување на квалитетот при вработување.