„14 кражби на нашиот ангел, и ден-денес не го оставаат гробот на мојот син, не знам со какво срце и душа сè уште крадат од гробот“, напиша денеска Драги Горгиев на својот фејсбук-профил
Драги Горгиев, татко на тапанарот на групата ДНК, Горги Горгиев, кој е еден од трагично загинатите во пожарот во т.н. кабаре „Пулс“ во Кочани, денеска преку објава на социјалните мрежи се пожали на кражби од гробот на неговиот син во Струмица.
Тој вели дека досега имало 14 кражби.
Во објавата тој сподели и видео, направено од безбедносна камера која директно гледа кон гробот на неговиот син, на кое може да се види жена како приоѓа до гробот, става во најлонска кеса некакви работи и си заминува.
Според датумот на видеото, снимката е направена вчера (31 мај 2026 г.) околу 13:20 часот.
„14 кражби на нашиот ангел, и ден-денес не го оставаат гробот на мојот син, не знам со какво срце и душа сè уште крадат од гробот. Да си ми здрава и жива тетке која и да си и да ти се здрави и живи децата“, напиша Драги Горгиев на Фејсбук.
Инаку, викендот христијанските верници го одбележуваа праникот Задушница, кога голем број семејства, роднини и пријатели ги посетуваат гробовите на свои починати блиски.
Горги Горгиев беше меѓу првите членови на бендот што ја придружуваше ДНК, за кого се дозна дека го загубил животот во пожарот во „Пулс“. Во пожарот загинаа и пејачот на бендот Андреј Ѓорѓиески, придружниот вокал Сара Пројковска, која беше и професорка на Факултетот за музичка уметност, клавијатуристот Филип Стевановски, гитаристот Александар Коларов, официјалниот фотограф на групата, Александар Ефремов тонецот на групата Игор Велков, битбоксерот Мартин Атанасовски-Буцо. Пејачот на групата Владимир Блажев-Панчо почина по неколкумесечна борба на лекарите за неговиот живот и е 63. жртва што ја однесе кобниот пожар.