„Ми треба време од неколку дена за да донесам дефинитивна одлука дали да одиме на брзо решавање на проблемот со отворање нова набавка и веднаш инсталирање комплетно нов систем или ова ќе може да се поправи. Се надевам до петок ќе ви кажам каква одлука ќе донесеме како Министерство за здравство“, изјави денеска новиот министер за здравство
До крајот на неделата се очекува да биде познато како новото раководство на Министерството за здравство на чело министерот Таравари ќе го решава проблемот со нефункционирањето на централниот компресорски систем на хируршките клиники во Клиничкиот центар „Мајка Тереза“ поради што тие повеќе од еден месец работат редуцирано со помош на надворешни компресори.
Таравари денеска по преземањето на функцијата министер од досегашната заменик-министерка за здравство Маја Манолев беше во посета на Клиничкиот центар во Скопје, каде што, како што кажа во изјава за медиумите, се сретнал и разговарал со речиси сите директори на овие клиники, како и со директорот на општите служби.
„Веднаш излегов на терен да видам тоа што е акутно, а тоа е дисфункционалноста на компресорите во салите на хируршките клиники во Клиничкиот центар“,
вели министерот за здравство во новата влада на чело со премиерот Христијан Мицкоски која вчера вечер беше избрана во Собранието.
Според она што му било кажано од директорите во некои операциони сали воопшто немало непријатен мирис, додека во одредени, како на Абдоминална хирургија, се чувствувал одреден мирис поради што анестезиолозите не дозволувале тие да функционираат со централниот компресорски систем.
Таравари изјави дека ќе му требаат неколку дена за да донесе конечна одлука како ќе се решава проблемот, односно дали ќе се набавува нов компресорски систем или ќе се оди на поправка на постојниот доколку тоа е возможно.
„Јас очекувам, се надевам утре-задутре, овие денови, да добијам извештај од испитувањата што се направени и постојано ме интересира како и што побргу да го решиме проблемот. Ми треба време од неколку дена за да донесам дефинитивна одлука дали да одиме на брзо решавање на проблемот со отворање на нова набавка и веднаш инсталирање на комплетно нов систем или ќе може ова да се поправи. Се надевам до петок ќе ви кажам каква одлука ќе донесеме како Министерство за здравство“,
изјави Таравари.
Меѓу клиниките што денеска ги посетил и со чии директори разговарал, одговарајќи на новинарско прашање, тој ги спомена клиниките за абдоминална хирургија, за пртопедија, тораковаскуларна, урологија и за пластична хирургија.
Рече дека дефинитивно оперативната програма е редуцирана за разлика кога работи централниот компресорски систем, меѓутоа, како што додаде министерот, сè функционира.
Во оваа насока тој повторно кажа дека сè уште немаат долгорочно и сигурно решение за проблемот.
„Подобро да бидеме внимателни да најдеме што побргу долгорочно решение бидејќи сепак огромен број пациенти со сериозни болести се лекуваат тука“,
изјави новиот министер за здравство.
На новинарско прашање дали Фондот за здравство има на располагање да префрли половина милион евра колку што според некои проценки би чинела новата компресорска станица, Таравари рече дека поминале само два часа откако ја презел министерската функција, но ова прашање, како што додаде, овие денови секако дека ќе биде приоритет.
Сепак, информациите што ги добил од стручните служби се дека доколку се оди на набавка на нова компресорска станица за тоа ќе бидат потребни околу шест месеци, што значи дека тоа би се случило најрано до крајот на декември, како што беше и првично најавено.
„Така ми велат стручните служби дека ќе треба минимум околу шест месеци, меѓутоа дозволете ни убаво да видиме, дали може ова да се поправи, ако може во ред сме, многу побргу ќе биде, а ако одиме на нов систем секако дека ќе треба време“,
рече Таравари.
Новиот министер за здравство беше прашан и состојбата со тетовската болница каде во вчерашното невреме што го зафати градот беа поплавени подрумски простории. Таравари рече дека утре планира да појде во Тетово, да види што се случува во оваа болница и што ќе преземат како Министерство.
„Ова често се случува во тетовската болница“,
рече Таравари.
Инаку, за потсетување, централниот систем за кислород и компримиран воздух во хируршките сали во Клиничкиот центар е надвор од функција од 18 мај поради непријатниот мирис кој се ширел од него.
Досегашната заменик-министерка за здравство Маја Манолева на почетокот на овој месец информира дека на седница на тогашната техничка влада биле донесени заклучоци со кои Владата им укажува на јавните здравствени установи, клиники, Заводот и Ургентниот центар да ја заменат опремата на централната компресорска станица со нова. Било укажано и на замена на инсталацијата и дислокација на централната компресорска станица.
Неколку дена претходно Манолева донесе наредба сите хируршки клиники во Клиничкиот центар во операционите сали да почнат со работа со користење на надворешни компресори и дополнително со садови со компримиран воздух.