Според извори на „360 степени“, тој е во стабилна состојба. Од ДУИ ја потврдија веста и дополнуваат дека тестот за ковид-19 засега му е негативен.
Претседателот на Собранието, Талат Џафери, денеска е примен на Инфективната клиника при Универзитетскиот клинички центар во Скопје, „Мајка Тереза“. Информацијата за „360 степени“ ја потврдија и од неговата матична партија, ДУИ.
„(Примен е н.з.) на системска контрола. На тестирањето (за ковид-19 н.з.) е негативен“,
велат од ДУИ.
И од неофицијални извори, „360 степени“ дознава дека Талат Џафери бил негативен на тестот за ковид-19, но дека повеќе симптоми укажувале на присуство на вирусот. Тој e во стабилна состојба, но има пневмонија.
Талат Џафери на 21 јули (во вторникот) за порталот „Плусинфо“ изјави дека се тестирал за ковид-19 и дека тестот му е негативен. Најави дека ако треба ќе направи уште еден тест пред одржувањето на конститутивната седница на Собранието. Во истиот текст беше пренесен и неговиот став дека по консултација со Комисијата за заразни болести,ќе се знае дали и новите пратеници ќе треба да се тестираат пред почнувањето на пратеничкиот мандат.