Според Тачи, математичката формулација 20 проценти во однос на Албанците треба да се замени со соодветна формулација како (албански народ, албански јазик)
Лидерот на ДПА, Мендух Тачи, вчера во Собранието се сретнал со лидерот на ДУИ, Али Ахмети, информираа од ДПА на Фејсбук. На средбата, Тачи го информирал Ахмети за резолуцијата усвоена на 8. конгрес на партијата.
„Вчера во просториите на Собранието на Република Северна Македонија се одржа средба меѓу претседателот на Демократската партија на Албанците, Мендух Тачи, и претседателот на Демократската унија за интеграција, Али Ахмети. Во оваа пригода Тачи го информира Ахмети за последната резолуција на 8. конгрес на ДПА, која се однесува на промена на членот од Уставот на РСМ каде што математичката формулација 20 проценти во однос на Албанците треба да се замени со соодветна формулација како (албански народ, албански јазик). На оваа средба се разговараше и за политичките актуелности во земјава и пошироко. Соговорниците се согласија дека ваквите средби треба да продолжат и со други политички фактори, експерти и граѓански општества“,
се наведува во партиското соопштение.
Укинување на 20-те проценти за официјалната употреба на албанскиот јазик во Северна Македонија неодамна побара и лидерот на Алијанса за Албанците, Арбен Таравари, кој нагласи дека тоа треба да се направи кога ќе се вметнуваат Бугарите во Уставот, што е услов наметнат со усвојувањето на т.н. француски предлог за отпочнување на преговори на земјава со Европската Унија.
„И лидерот на македонската опозиција Христијан Мицкоски неколку пати потенцираше дека нема проблем со симнување на 20-те проценти, доколку има согласност и секако дека ние ќе одлучуваме. Не велам дека тоа треба да биде услов, но ќе видиме како работите ќе се развиваат. Според тоа, ќе донесеме одлука, но мислам дека на секој начин ќе инсистираме да се отвори Уставот и да се тргнат тие 20 проценти“,
рече Таравари.