‘Повеќе од монарх’, ‘пример за посветеност и лидерство’ и ‘неуморна служба за доброто на Британија’ – светските лидери се збогуваат со британската кралица Елизабета Втора која што почина денеска на 96-годишна возраст
По смртта на британската кралица Елизабета Втора, голем број светски лидери изразуваат сочувство и жалење поради нејзината смрт, но и восхит за нејзиниот живот и долговечното 70-годишно владеење.
Поранешниот британски премиер Борис Џонсон изјави дека денот на смртта на кралицата Елизабета Втора е најтажниот ден за земјата. Само неколку дена по средбата со кралицата за да поднесе оставка како премиер, Борис Џонсон му оддаде почит на „безвременскиот“ монарх кој „имаше единствена и едноставна моќ да не направи среќни“.
Statement on the death of Her Majesty Queen Elizabeth II (1/3) pic.twitter.com/kDN6cW8Njp
— Boris Johnson (@BorisJohnson) September 8, 2022
Американскиот претседател Џо Бајден и првата дама Џил Бајден издадоа изјава за смртта на кралицата, опишувајќи ја како „повеќе од монарх“. Во соопштението на Белата куќа се вели дека во свет на постојани промени, кралицата Елизабета била постојан извор на утеха и гордост за генерации Британци, вклучително и за многумина кои никогаш не ја познавале својата земја без неа.
„Таа беше првиот британски монарх со кој луѓето ширум светот можеа да почувствуваат лична и непосредна врска. Таа, пак, целиот свој живот го посвети во нивна служба“,
посочија Џо и Џил Бајден.
Our statement on the death of Queen Elizabeth II. pic.twitter.com/0n7pmVVg2w
— President Biden (@POTUS) September 8, 2022
Сочувство за смртта на кралицата изрази и канадскиот премиер Џастин Трудо.
„Со најтешка болка ја примивме веста за смртта на најдолготрајниот канадски монарх, нејзиното височество кралицата Елизабета Втора. Таа беше постојано присуство во нашите животи – и нејзината услуга за Канаѓаните засекогаш ќе остане важен дел од историјата на нашата земја“,
вели канадскиот премиер Џастин Трудо.
По повод смртта се огласи и украинскиот претседател Володимир Зеленски.
„Со длабока тага ја примивме веста за смртта на нејзиното височество кралицата Елизабета Втора. Во име на народот, изразуваме искрено сочувство до кралското семејство, целото Обединето Кралство и Комонвелтот за оваа ненадоместлива загуба. Нашите мисли и молитви се со вас“,
истакна Зеленски.
It is with deep sadness that we learned of the death of Her Majesty Queen Elizabeth II. On behalf of the 🇺🇦 people, we extend sincere condolences to the @RoyalFamily, the entire United Kingdom and the Commonwealth over this irreparable loss. Our thoughts and prayers are with you.
— Володимир Зеленський (@ZelenskyyUa) September 8, 2022
Рускиот претседател Владимир Путин во пораката со сочувство во врска со смртта на британската кралица го истакна нејзиниот авторитет на меѓународната сцена, како и љубовта и почитта на нејзините поданици.
„Најважните настани во поновата историја на Обединетото Кралство се нераскинливо поврзани со името на Нејзиното Височество. Многу децении, Елизабета Втора со право уживаше во љубовта и почитта на своите поданици, како и авторитет на светската сцена“,
рече рускиот лидер во пораката.
По повод денешната смрт на кралицата Елизабета Втора сочувство изразија и лидерите на ЕУ и НАТО.
„Малкумина имале такво влијание во светската историја“,
напиша на Твитер претседателката на Европскиот парламент Роберта Мецола, додавајќи дека Елизабета Втора е пример за сите.
Претседателот на Европскиот совет Шарл Мишел истакна дека покојната британска кралица секогаш можела да ја покаже важноста на трајните вредности во современиот свет преку нејзината посветеност на работата.
Сочувство изрази и шефицата на Европската комисија, Урсула фон дер Лајен, посочувајќи дека британската кралица беше една од најпочитуваните личности во светот.
She witnessed war and reconciliation in Europe and beyond, and deep transformations of our planet and societies.
— Ursula von der Leyen (@vonderleyen) September 8, 2022
She was a beacon of continuity throughout these changes, never ceasing to display a calmness and dedication that gave strength to many.
May she rest in peace. pic.twitter.com/q77q9o2KWp
Според генералниот секретар на НАТО, Јенс Столтенберг, кралицата била пример за посветеност и лидерство.
По повод смртта на британската кралица се огласи и папата Франциск кој порача дека е длабоко погоден поради нејзината смрт, оддавајќи ѝ почит на нејзината неуморна служба за доброто на Британија и Комонвелтот.