Лога спомена и двајца поранешни функционери од власта, обвинетата Фросина Ременски, за која рече дека често присуствувала на состаноците и експратеникот Александар Кирацовски кој, пак, го виделе во Сојузот, но не бил на средбите
Ресул Лога, косопственик на фирмата „Дрим билдинг“, за која Обвинителството тврди дека е една од измамените од „Меѓународен сојуз“, денеска во судница се соочи со Бојан Јовановски-Боки 13 и другите обвинети, раскажувајќи како и зошто влегле во соработката со невладината организација.
Посочи дека верувале во проектот за меѓународни старски домови и влегле во него, зашто им се изгледал профитабилен, а во разговорите ги договориле условите за странките – „Меѓународен сојуз“ и фирмата. Според овој договор, „Меѓународен сојуз“, рече, имал обврска да обезбеди маркица, локација и дозвола за градба од Општина Карпош, а фирмата – пари.
На Бојан Јовановски, рече, му дале 350 000 евра во кеш, а потоа, според договорот, на сметка исплатиле 16 милиони и 100 илјади денари за авторски права на обвинетата заменик-претседателката на „Меѓународен сојуз“, Јасна Мандиќ-Ерцеговиќ.
Лога спомена и двајца поранешни функционери од власта, обвинетата Фросина Ременски, за која рече дека често присуствувала на состаноците и експратеникот Александар Кирацовски кој, пак, не бил на средбите.
„Довербата во проектот и во ‘Меѓународниот сојуз’ ја стекнавме од разговорите, од самиот проект, но и затоа што тука имаше и луѓе од власта, како Фросина, а во некој одреден момент беше и Кирацовски. Го видовме таму во ‘Меѓународниот сојуз’, но на која линија беше со нив, не знам“,
рече Лога.
Рокот што бил составен дел од договорот, според неговото сведочење, бил од 90 до 180 дена за „Меѓународен сојуз“ да ги исполни обврски. Меѓутоа, тоа не се случило, па бизнисмените решиле да си ги бараат парите назад.
„Господинот Бојан врати 155 000 евра и се надевавме дека за бргу ќе ги врати и другите пари”,
рече Лога објаснувајќи дека на тие средби не бил присутен тој туку партнерот Ардијан Амзоски.
Јовановски, пак, преку прашањата што ги поставуваше сакаше да докаже дека не станува збор за измама.
„Дали ќе се согласите дека лице што ви ги враќа средствата не може да биде измамник кон вас?“,
праша Јовановски.
Тој со прашањата алудираше и на тоа дека Лога не можел да знае колку пари му се вратени бидејќи не бил на состаноците, а бизнисменот возврати дека има целосна доверба во Амзоски, а и кога одел да ги зема парите назад тој го чекал партнерот надвор.
На прашање на адвокатот на Јовановски, Сашко Дукоски, зошто не се реализирал проектот, бизнисменот рече дека за тоа треба да праша по некој друг, а не него.
По Лога, во судница треба да сведочи и Ардијан Амзоски.
Во предметот Бојан Јовановски-Боки 13 е првообвинет и се товари за делата измама и перење пари. Јасна Мандиќ-Ерцеговиќ и асистенката Христина Блажевска, пак, се обвинети за помагање во овие дела, а Фросина Ременски се товари за помагање во делото измама. Таткото на Боки, Миле Јовановски, пак, е петтообвинет за помагање во перењето пари и за делото неовластено изработување, држење, посредување и тргување со оружје бидејќи при претрес во неговиот дом биле пронајдени три полуавтоматски пиштоли и муниција за кои немал дозвола. Како правно лице обвинета е и невладината организација.
На претходните рочишта минатиот месец сведочеа претседателката на собранието на „Меѓународен сојуз“, Агапи Дика, бизнисменот Орце Камчев, координатор во невладината организација „Меѓународен сојуз“, Јованка Кухар и пензионерката Лилјана Тодоровска.