Судијката, која е на чело на судечкиот совет во случајот „Рекет“, Васка Николовска-Максевска, вели дека не чувствува никакви притисоци, ниту политички ниту медиумски, во врска со овој предмет кој е во фокусот на јавноста и постојана тема на меѓупартиските препукувања.
Таа денеска се сретна со новинарите, што беше прва ваква средба на судија од Основниот кривичен суд што постапува во некој предмет. Николовска-Масевска не ги коментираше доказите во „Рекет“ ниту, пак, изнесуваше ставови. Одговарајќи на прашањата на судските известувачи, судијката посочи дека до 15 март се закажани уште осум рочишта за овој предмет, а каква ќе биде динамиката и дали може да се очекува пресуда до изборите на 12 април не сакаше да прејудицира.
Новинарите ја прашаа судијката и дали на една од снимките од следењето на Зоран Милески-Кичеец, обезбедени со ПИ-мерки, се гледа дека тој се среќава со братот на Зоран Заев, Вице, и со адвокатот Ване Андреев. Таа, пак, не можеше да потврди. За адвокатот рече дека го познава, а братот на доскорешниот премиер го има видено само на портали. Но, бидејќи снимката е направена од далеку и не се гледа јасно кои се лицата, како што рече, не е сигурна дали станува збор за споменатите лица. Кои се лицата не беше јасно ниту за новинарите кога снимката се пуштате во судницата, а двете имиња на паузите во судските ходници ги посочи Бојан Јовановски-Боки.
Во однос на она што следува во судскиот процес „Рекет“, Николовска-Масевска потврди дека одбраната има вкупно 25 сведоци, 12 предложени од Боки и 13 на предлог на Катица Јанева.
Кој сè ќе дојде во судница да сведочи, конкретни имиња таа не спомена, но она што е познато, а беше кажано на судското рочиште, е дека на следното рочиште наредниот четврток треба да сведочи поранешниот градоначалник на Општина Центар и бизнисмен, Владимир Тодоровиќ, а следниот петокот Дејан Панделевски, син на бизнисменот Цветан Панделевски, кој е осомничен во случајот „Империја“. За наредните четврток и петок, одбраната на Боки треба да обезбеди уште по еден сведок. Меѓу сведоците на Јанева, пак, на листата, како што беше најавено и од нејзините адвокати, се речиси сите поранешни обвинители од СЈО.
*Поврзани вести:
Боки: Ми нудеа да ме пуштат од притвор ако кажам дека Јанева е виновна и дека Ременски зела пари