На лауреатот на „Златниот венец“ за оваа година, наградата ќе му биде доделена следната година
Поради ситуацијата со пандемијата, оваа година Струшките вечери на поезијата ќе се одржат во редуцирана форма и пократко, од 28 до 30 август, соопшти дирекцијата на фестивалот.
Комисијата за заразни болести го одобрила подготвениот протокол за негово организирање во овој формат за да го зачува континуитетот што фестивалот го има од 1961 година.
„Сегашните околности дозволуваат да се организира фестивал со физичко присуство на домашните поети, а поканетите учесници од странство, поради рестрикциите во однос на патувањата и авионските летови, но и заради минимизирање на ризикот од ширење на вирусот, ќе бидат претставени преку видеочитања. Специјално видеообраќање како и видеочитање, подготви и годинешниот лауреат на СВП, израелскиот поет Амир Ор, кој ќе биде специјален гостин на наредното, јубилејно 60-то издание на СВП во 2021 година, кога и ќе му биде врачен ‘Златниот венец’, заедно со лауреатот за 2021 година“,
соопштија од СВП.
Повеќе од 30 домашни и странски поети ќе учествуваат на главните фестивалски читања. Дел од програмата ќе бидат и петте кандидати од потесниот избор за наградата „Браќа Миладиновци“ која ќе биде доделена и оваа година за најдобра поетска збирка помеѓу две изданија на СВП, а ќе бидат застапени и слем-поети од земјава и од странство.
За намалување на ризикот од ширење на вирусот, како и заштита на здравјето на учесниците и на публиката, оваа година има измена на локацијата на одржување на фестивалот – покриената тераса на хотел „Дрим“, на која и вообичаено се одвиваат дел од програмските активности во редовните изданија на фестивалот.
Ќе биде ограничено и физичкото присуство на публиката, а фестивалот целосно се пренесува во живо на официјалниот Јутјуб-канал на СВП.