Приштина и Белград мора да се вклучат во дијалог со посредство на ЕУ, како единствен пат кон мирот и нормализацијата на односите. Приштина треба да ја деескалира ситуацијата и да не презема еднострани, дестабилизирачки чекори, порача шефот на НАТО
Генералниот секретар на НАТО, Јенс Столтенберг, побара од Приштина да ја деескалира ситуацијата и да не презема „еднострани и дестабилизирачки чекори“.
Шефот на НАТО во објава на Твитер кажа дека разговарал со високиот претставник за надворешна политика и безбедност на Европската Унија, Жозеп Борел, во врска со ситуацијата во Косово, по зголемувањето на тензиите во косовските општини со мнозинско српско население.
„Приштина и Белград мора да се вклучат во дијалог со посредство на ЕУ, како единствен пат кон мирот и нормализацијата на односите. Приштина треба да ја деескалира ситуацијата и да не презема еднострани, дестабилизирачки чекори. Мисијата на НАТО во Косово – КФОР – ќе продолжи да обезбедува безбедна средина“
напиша Столтенбер во објава на Твитер.
Spoke to HR/VP @JosepBorrellF about #Kosovo. Pristina & Belgrade must engage in the EU-led dialogue now, as the only way to peace & normalisation. Pristina must de-escalate & not take unilateral, destabilising steps. @NATO_KFOR will continue to ensure a safe & secure environment.
— Jens Stoltenberg (@jensstoltenberg) May 28, 2023
Тензиите во општините со мнозинско српско население во Косово се случија откако новоизбраните градоначалници, на изборите што ги бојкотираа Србите, на 26 мај ги презедоа функциите и влегоа во општинските згради. Во судир на косовската полиција со Србите беа повредени десетина лица.
По тензиите од пред два дена, ситуацијата на северот на Косово денеска и вчера е мирна, но полициски службеници и натаму ги обезбедуваат општинските згради во Звечан, Лепосавиќ и Зубин Поток.
По тензиите во општините со мнозинско српско население во Косово, со реакција се јави меѓународната заедница.
Државниот секретар на САД, Ентони Блинкен, го повика премиерот Албин Курти да го смени курсот и потенцира дека Косово постапува спротивно на советите од САД и од европските партнери. Порача дека ваквите постапки ќе се одразат на билатералните односи меѓу Косово и Србија.
Европската Унија, пак, нагласи дека нема да прифати никакви дополнителни еднострани или провокативни дејствија и порача дека приоритет треба да бидат зачувувањето на мирот и безбедноста на теренот.