Посочи дека Алијансата го зголемила присуството во Косово со околу 1 000 дополнителни трупи и со потешко вооружување, но и дека дополнително ќе се разгледува предлогот на премиерот на Албанија, Еди Рама, за дополнително зголемување на силите на НАТО, како и да се гарантира безбедноста на границата меѓу Косово и Србија
Не гледаме директна воена закана за која било од земјите во регионот, рече генералниот секретар на НАТО, Јенс Столтенберг, на заедничката прес-конференција по неформалниот состанок на лидерите на НАТО-сојузните од регионот.
На прес-конференцијата свои изјави имаа Еди Рама, премиер на Република Албанија, Зоран Милановиќ, претседател на Хрватска, како и Милојко Спајиќ, премиерот на Црна Гора.
„Не гледаме закана за некој од сојузниците на НАТО во овој регион, но она што го гледаме е зголемувањето на тензиите, особено во Косово. Гледаме и дека има тензии кои се јавуваат во Босна и Херцеговина, но не гледаме директна воена закана за која било од земјите во регионот“,
рече Столтенберг.
Сепак, посочи дека сите треба да разберат зошто овој регион е од толкава важност, особено за НАТО.
„Да, загрижени сме за развојот на настаните кои одат секој во своја насока во одредени држави во овој регион, но треба да се препознае силата и важноста на НАТО. Алијансата е присутна веќе долги години во овој регион“,
додаде тој.
Посочи дека во Косово го зголемиле присуството со околу 1 000 дополнителни трупи и со потешко вооружување.
„Ние сме претпазливи, одблизу ја набљудуваме ситуацијата и ќе направиме она што е потребно за да се заштитат и одбранат сите сојузници. Но, тука повеќе се работи како да помогнеме да се стабилизира нашето соседство, зашто кога нашите соседи се постабилни, ние сме посигурни, затоа мене ми е полесно да седнам со сите лидери од овој регион и да ги споделам нашите процени, така подобро ќе разбереме како треба да напредуваме“,
објасни генералниот секретар.
Според него, Западен Балкан се важни за НАТО, зашто се сојузници, партнери во регионот и имаат заедничка историја, но и обврска во обезбедувањето мир.
„Ќе го разгледам предлогот од премиерот на Албанија, Еди Рама, да се зголеми бројот на силите на НАТО во Косово и на неопходноста да се гарантира границата меѓу Косово и Србија, поддржан од претседателот на Хрватска, Зоран Милановиќ, секако ќе го разгледаме заедно. Треба почесто да се среќаваме и да ги поканиме партнерските држави“,
заклучи Столтенберг.
Претходно, Столтенберг рече дека Република Северна Македонија е валиден сојузник на НАТО, која дава заеднички придонес за заедничката безбедност.
„Земјата води со сопствен пример за успешни мултиетнички односи, како луѓето од различни етнички и религиозни определби можат заедно да живеат и да водат заедничка мирољубива коегзистенција,
додаде тој.
Неколкупати посочи и колку овој регион е стратегиски важен за НАТО.
„Авторитарните држави како Русија го загрозуваат нашиот демократски интегритет со киберзакани. Затоа важно е да се избере дијалогот и дипломатијата во однос на конфликтот и војната. Време е да се надминат регионалните конфликти кои траат предолго. На состанокот дискутиравме и за агресијата врз Украина од страна на Русија. Двете страни треба да престанат да бидат во конфликт. Ги пофалувам сојузниците на НАТО што даваат витални решенија“,
посочи генералниот секретар.
Столтенберг најави дека ќе почнат да се подготвуваат за наредниот Самит на НАТО во Вашингтон.
Со денешниот самит во Скопје генералниот секретар на НАТО ќе ја заокружи неколкудневната турнеја на земјите од Западен Балкан, во рамките на која ги посети Босна и Херцеговина, Косово, Србија и вчера и денеска С Македонија.