Коментирајќи ги тензичните протести кои денеска се случуваа во Благоевград кои беа предводени од бугарскиот европратеник од редовите на ВМРО-БНД, Ангел Џамбаски, Стојков вели дека оние кои протестирале се платеници, а нагласи дека Македонците во Бугарија немаат проблеми со локалното бугарско население
Коментирајќи го денешното отворање на македонскиот културен клуб „Никола Вапцаров“ во Благоевград, Стојко Стојков од ОМО „Илинден Пирин“ вели дека отворањето на клубот нема да го смени ставот на бугарската влада за македонското население во Бугарија, но оти е добро што отворањето привлекло големо внимание и кај македонската и кај бугарската јавност.
Во гостувањето во „Тема на денот“ во Дневникот на ТВ Сител, Стојков вели дека меѓу другото, отворањето на македонскиот клуб е шанса на граѓаните во Бугарија да им се покаже оти Македонците не се нивни непријатели и немаат ништо против Бугарија.
Коментирајќи ги тензичните протести кои денеска се случуваа во Благоевград кои беа предводени од бугарскиот европратеник од редовите на ВМРО-БНД, Ангел Џамбаски, Стојков вели дека оние кои протестирале се платеници, а нагласи дека Македонците во Бугарија немаат проблеми со локалното бугарско население.
„Имаше групи на ВМРО-БНД организирани коишто не знаеме од каде се, можеби се од другиот крај на земјата. Такви групи се појавуваат за да создаваат проблеми и да создаваат впечаток дека населението е против. Населението не е против и не се интересира. Гледате, луѓето си седат по кафеаните, ние си поминуваме, нема никаков проблем“,
рече Стојков, посочувајќи оти оние кои денеска протестирале во Благоевград се платеници.
Стојков порача дека Македонците во Бугарија 30 години живеат без поддршка од македонските власти и дека нивната борба била самостојна, единствено поддржана од некои меѓународни институции и демократската јавност.
„За нас тоа не ништо ново, исто како што не е ништо ново што Бугарија одбива да не признае. Тоа нема никаква промена за нас. Едноставно за нас е важно што отворањето на клубот привлече големо внимание особено во македонската јавност и се надеваме дека од тоа ќе произлезат позитивни работи“,
нагласи Стојков од ОМО „Илинден Пирин“.
Во присуство на гости од Македонија и Македонци што живеат во Бугарија денеска во Благоевград беше отворен македoнскиот културен клуб „Никола Вапцаров“. На настанот присуствуваа лидерот на ВМРО-ДПМНЕ, Христијан Мицкоски, лидерот на Левица, Димитар Апасиев, како и шефот на Кабинетот на Претседателот, Миле Бошњаковски. На отворањето на клубот не присуствуваше ниту еден претставник од Владата.