Не може да се каже точно за колку време се лекува еден пациенти со ковид-19, бидејќи зависи од повеќе фактори. Директорката на Инфективната клиника Милена Стевановиќ вели дека секој пациент е различен.
„Сите сме различни, различно реагираме на третман, но и различно реагираме на инфекцијата или на некоја болест. Во просек, околу 16 дена се лекува пациент со средно тешка клиничка слика на ковид. Тешките клинички слики се лекуваат многу подолго, токму поради последиците што ги остава инфекцијата“,
рече Стевановиќ на денешната прес-конференција.
Таа додава дека пациентите често добиваат негативни тестови на ковид-19 многу пред да бидат излекувани или испишани од болница, но последиците што инфекцијата ги остава бараат дополнително време за лекување.
„Оттука имате и еден индиректен одговор колкава е фреквенцијата на приеми и исписи. Исклучително рационално се користи секој еден кревет на клиниката, вклучувајќи ја тука и модуларната болница. Процедурата е откако ќе се ослободи кревет, а ние секогаш сакаме тоа да е излекуван пациент, следува процедура на чистење и дезинфекција на собата, со цел да бидеме подготвени за прием на следен пациент“,
додаде Стевановиќ.