Актуелните министерка за култура и вицепремиер за економски прашања, Ирена Стефоска и Фатмир Битиќи, не поднеле анкетни листови по изборот на функција, информираше на денешната 40. седница Државната комисија за спречување на корупција (ДКСК).
Претседателката на ДКСК, Билјана Ивановска, посочи дека рокот за поднесување е 30 дена и се дадени во натамошна постапка за издавање платни налози.
„Анкетни листови при престанок на функција на техничката влада не поднеле министерот за надворешни работи Никола Димитров, министерот за животна средина Насер Нуредини, заменик-министерот за транспорт Садим Бекири, дополнителниот заменик-министер за земјоделство Цветан Трипуновски, заменик-министерот за здравство Асим Муса, како и министерот за локална самоуправа Сухејл Фазлиу“,
изјави Ивановска.
Анкетни листови, посочи Ивановска, за избор и за престанок на функција и изјава за судир на интереси не поднеле заменик-министерот за одбрана Беким Масути, заменик-министерот за надворешни работи Андреј Жерновски, заменик-министерот за земјоделство и шумарство Благе Цветковиќ и заменик-министерот за здравство Арменд Арслани, додека пак актуелната министерка за култура Стефоска и заменик-министерката за образование Елизабета Наумовска не поднеле изјава за интереси.
Од ДКСК информираа дека се проверени членовите на Владата избрани на 31 мај 2017 година, членовите на техничката влада избрани на 3 мај 2020 година, како и актуелните членови на Владата избрани 30 август 2020 година.