Оваа иницијатива се покренува по повод двегодишнината од Преспанскиот договор
Заев беше во обиколка и на манастирот „Трескавец“ кај Прилеп, каде што најави поддршка, преку Министерството за култура, за реставрација на манастирската црква „Успение на Пресвета Богородица“, за да се заштитат вредните артефакти
Старото училиште во Љубојно, во Преспанскиот регион, ќе стане центар за грижа и промоција на македонскиот јазик, по повид двегодишнината од потпишувањето на Преспанскиот договор меѓу С Македонија и Грција.
Како што соопштија од Владата, при работната посета на Преспа, Заев извршил увид на напредокот на работите на иницијативата за центар за грижа и промоција на македонскиот јазик во старото училиште „Димитар Влахов“ во село Љубојно, заедно со свои соработници, како и со градоначалникот на Ресен, Живко Гошаревски и Мери Стојанова, директорка на битолскиот Завод и музеј.
Оваа иницијатива, истакнал Заев, се покрена по повод две години од потпишувањето на Договорот од Преспа, како и во чест на 76 годишнината од основањето на второто училиште на мајчин македонски јазик во Љубојно на 15 ноември 1944 година, само една година откако првото училиште беше основано во Дебарца и Подвис, уште за време на Втората светска војна во 1943 година.
„Со Договорот од Преспа ги премостивме речиси тридецениските разлики со Грција и ги обезбедивме нашите перспективи во евроатлантските и европските интеграции. Уште две главни придобивки произлегоа од овој историски договор. Се заштити нашиот идентитет во рамките на меѓународното право да се идентификуваме како Македонци, кои зборуваат македонски јазик, а со тоа се потврдија и нашата култура и културно наследство“,
изјавил Заев, како што информираа од Владата.
Во Преспа, посочува Заев на ФБ, ќе се гради и мултимедијален центар за размена на идеи меѓу младите од регионот, за кој од буџетот веќе се издвоени 100 милиони денари. Тоа ќе биде место каде што ќе се организира меѓународен „Преспа -форум за дијалог и соработка“.
Заев објави претпладнево на фејсбук и фотографии од посетатат на обновените конаци на манастирот „Трескавец“ кај Прилеп.
„Седум години од опожарувањето, манастирскиот комплекс повторно блеска во полн сјај“,
забележа Заев.
Премиерот посочува дека сџе разгледува можноста за обезбедување поддршка преку Министерството за култура за реставраторските работи на манастирската црква „Успение на Пресвета Богородица“, за да се заштитат вредните артефакти од 13 век.
„Во манастирот отидов со добра вест – дека се обезбедени средства од програмата на Владата за поддршка на општините, за водовод до манастирот во висина од 5,5 милиони денари. Разговаравме и за можностите, во рамките на програмата на Министерството за култура да се вклучи и поддршка за реставраторските работи на манастирската црква „Успение на Пресвета Богородица““,
напиша Заев.