По пријавувањето на случајот од струмичката болница, каде што девојчето најпрвин било донесено и потоа е испратено на лекување во Скопје, тим од струмичкиот Центар за социјални работи излегол на терен и утврдил дека останатите три деца од семејството привремено се згрижени кај дедото, а од утре ќе почне процедурата за нивно сместување во згрижувачко семејство
За тоа што точно се случило со четиригодишното дете од Струмица, одговор треба да даде истрагата на полицијата, социјалните служби и судски вештак, иако нејзината мајка на лекарите им кажала дека повредите се последици на напад од куче од пред две недели
Останатите три малолетни деца од семејството на четиригодишното девојче, кое со тешки повреди на 17 јануари беше хоспитализирано на комплексот клиники „Мајка Тереза“ во Скопје, ќе добијат старател по службена должност, односно ќе бидат сместени во згрижувачко семејство, потврдуваат за МИА од Министерството за труд и социјална политика (МТСП).
Како што информираат оттаму, по пријавувањето на случајот од Струмичката болница, каде што девојчето најпрвин било донесено и потоа е испратено на лекување во Скопје, тим од струмичкиот Центар за социјални работи излегол на терен и утврдил дека децата привремено се згрижени кај дедото, а од утре ќе почне процедурата за сместување во згрижувачко семејство.
Од МТСП додаваат дека семејството не е евидентирано во системот бидејќи имало привремен престој во Струмица и членовите на семејството немале лични документи и не можеле да остваруваат права од социјална и детска заштита.
„Предвидено е и работа со мајката со стручен тим за зајакнување на капацитетите во делот на родителството и грижа за децата, а во тој период тие ќе бидат сместени во згрижувачко семејство“,
додаваат од Министерството.
Четиригодишното девојче, пак, е со стабилни витални параметри, вели директорката на Клиниката за детски болести, Валентина Цвејоска-Чолаковска. Тоа, како што вели Цвејоска-Чолаковска, е на лекување и следење на Одделот за гастроентерохепатологија.
„Во лекувањето се вклучени и колегите од Клиниката за детска хирургија, а конзилијарно е водено со повеќе субспецијалисти од Клиниката“,
вели Цвејоска-Чолаковска во изјава за МИА.
Поради состојбата на девојчето, како што додава таа, веднаш по приемот биле известени надлежните во Министерството за внатрешни работи, како и социјалните служби и јавен обвинител од Струмица, кој повикал и судски вештак.
На 17 јануари, од болницата во Струмица, со возило на Итната медицинска помош и во придружба на лекар, на Клиниката за детски болести било донесено четиригодишно женско дете, како што рече Цвејоска-Чолаковска, во исклучително тешка состојба, потхрането, хигиенски запоставено, со гангренозни промени на прстите на дланките и на стапалата.
При дијагностичките прегледи кај девојчето биле утврдени скршеници по телото, а тоа било донесено во толку тешка состојба што докторите на Клиниката се прашувале како воопшто преживеало. За тоа што точно се случило, одговор треба да даде истрагата на полицијата, социјалните служби и судски вештак, иако нејзината мајка на лекарите им кажала дека повредите се последици на напад од куче од пред две недели.
Пред неколку недели поради тешки повреди почина двегодишно дете од Кичево, за кого мајката првично кажуваше дека се последица од игра. Но, подоцна од Основното јавно обвинителство (ОЈО) Кичево информираа дека е покрената истрага за случајот и е предложен притвор за таткото на детето, кој е осомничен дека ја лишил од живот сопствената двегодишна ќерка при вршење семејно насилство.