Како ССМ, покрај тоа што не беа прифатени нашите антикризни мерки, повторно ќе преземеме чекори за посилен притисок и повторно излегување на улиците и изразување на незадоволството
Сојузот на синдикати на Македонија пресмета дека синдикалната потрошувачка кошничка во октомври достигнала 51 514 денари.
„Во споредба со октомври 2020 година оваа година таа е зголемена за цели 17 000 денари. Тоа значи дека инфлацијата сериозно ги нагризува платите и работниците ја губат куповната моќ врз средствата што ги земаат како плата“,
вели потпретседателот на ССМ Иван Пешевски.
Тој додава дека во среда ќе заседава Претседателството на ССМ како највисок орган на синдикатот на кое сериозно ќе бидат разгледани сите можни облици и притисоци што ќе ги преземат.
„Како ССМ, покрај тоа што не беа прифатени нашите антикризни мерки, повторно ќе преземеме чекори за посилен притисок и повторно излегување на улиците и изразување на незадоволството“,
вели Пешевски.
Пешевски вели дека минималните трошоци на едно четиричлено семејство повеќе не можат да се задоволат ниту со една просечна и една минимална кошничка.
Државниот завод за статистика денеска излезе со податок дека трошоците на животот во октомври во однос на октомври лани бележат зголемување од 19.8 отсто, а цените на мало од 15.4 отсто.
Во однос на септември годинава, пак, трошоците за живот се поголеми за 1,4, а цените на мало за 0,6 отсто.
Како што информираат од ДЗС, зголемување на цените споредено со месец септември има речиси кај сите производи и услуги, освен кај маслото и маснотиите, кај услугите за сместување, туристичките аранжмани, теписите и другите подни покривки, воздухопловниот патнички транспорт, градините, растенијата и цвеќињата, резервните делови и приборот за сопствените превозни средства и за моторните возила каде е забележано нивно намалување.