Синдикатот бара веднаш да биде зголемена минималната плата на 18 000 денари во нето-износ и таа да не биде пониска од 60 проценти од просечно исплатената месечна нето-плата во последните три месеци, како и задолжително усогласување на сите други плати во државата
Сојузот на синдикати на Македонија го формира главниот штрајкувачки одбор, а од исходот на средбата в понеделник во Владата ќе зависат натамошните чекори на синдикатот.
Синдикатот бара веднаш да биде зголемена минималната плата на 18 000 денари во нето-износ и таа да не биде пониска од 60 проценти од просечно исплатената месечна нето-плата во последните три месеци, како и задолжително усогласување на сите други плати во државата.
Дел од барањата на ССМ, за кои в понеделник ќе се разговара со владините претставници, се и потпишувањето општ колективен договор за јавниот сектор со кој ќе се врати регресот за годишен одмор познат како К-15.
„Штрајкувачкиот одбор во вторник по состанокот во Владата ќе утврди време и начин на изразување на работничкото незадоволство преку спроведување на штрајкот и разните облици за притисок и изразување на работничкото незадоволство, а во зависност од резултатот на преговорите“,
информира ССМ по денешниот состанок на Претседателството и Советот како највисоки тела.
Од ССМ денеска повторно ги повикаа пратениците да ги изгласаат измените на законот што ССМ ги поднесе до пратениците со кои ќе се реализира зголемувањето на минималната плата.