Се очекува да се создадат услови за поместување во процесот на интеграцијата на С Македонија во ЕУ, во кој Бугарија, со нејзиното искуство од петнаесетгодишното членство, може да ја преземе улогата на лидер во поддршката,рекол македонскиот премиер
Претстои период на политичка стабилност во двете земји за постигнување напредок во билатералните односи и во отворањето на заедничката европска перспектива на двете земји, рекол македонскиот премиер Димитар Ковачевски на денешната средба во Софија со бугарскиот претседател Румен Радев, кому му честитал за реизборот на функцијата.
По заедничката седница на владите на Северна Македонија и на Бугарија во вилата „Билјана“, Ковачевски замина во претседателската резиденција во Софија, придружуван од министрите Артан Груби, Славица Грковска, Бујар Османи, Фатмир Бесими, Горан Милевски, Бисера Костадиновска Стојчевска и Адмирим Алити.
Како што соопштија од Владата, Ковачевски, на средбата, изразил надеж дека со конституирањето на највисоките државни институции по изборите, како и со новиот состав на Владата во Скопје следи период на политичка стабилност кој треба да се искористи за напредок на односите меѓу двете земји.
Ковачевски изразил задоволство од резултатите од заедничката седница со Владата на Бугарија, со што, како што се посочува, двете земји започнуваат еден нов процес на соработка, со цел да се обезбеди интензивирање и продлабочување на добрососедските односи во многу области.
„Ќе се залагаме за дијалог со почитување на европските вредности и со почитување на достоинството на македонските граѓани и на граѓаните на Бугарија. Од резултатите и соработката, низ искрен дијалог, се очекува да се создадат услови за поместување во процесот на интеграцијата на Северна Македонија во ЕУ, во кој Бугарија, со нејзиното искуство од петнаесетгодишното членство, може да ја преземе улогата на лидер во поддршката “,
рекол Ковачевски, според соопштението од Владата.
Во разговорот било истакнато дека средбите на високо и на највисоко ниво испраќаат силна и јасна порака до јавноста. Во таа насока, Ковачевски и Радев се согласиле дека придонес во таа насока се очекува и од сите идни средби на највисоко политичко ниво.