Ваквото барање, како што кажа српскиот претседател Вучиќ, уште вечерва во електронска форма ќе биде испратено до КФОР, а утре тоа ќе биде доставено и до командантот или претставникот на КФОР на преминот со Косово. Одлуката е донесена едногласно, рече Вучиќ, и додаде дека ова би било добра одлука која ќе ги намали тензиите
Со едногласна одлука владата на Србија вечерва одлучи да испрати барање до КФОР за враќање на одреден број (до илјада) припадници на српските безбедносни сили на територијата на Косово, изјави вечерва претседателот на Србија, Александар Вучиќ за српскиот радиодифузен сервис.
Ваквото барање, како што кажа Вучиќ, уште вечерва во електронска форма ќе биде испратено до КФОР, а утре тоа ќе биде доставено и до командантот или претставникот на КФОР на преминот со Косово.
Одлуката е донесена едногласно, рече Вучиќ, и додаде дека ова би било добра одлука која ќе ги намали тензиите.
„Мислам дека тоа би било важно за заштита на српското население и пред се за контрола на, како што ги нарекуваат, граничните премини, всушност административните премини ‘Јариње’ и ‘Брњак’, а тоа драматично би ги намалило тензиите“,
Тој додаде дека очекува барањето да не биде прифатено врз основа на пораките на меѓународните претставници во претходните денови, иако, како што рече, барањето мора да биде прифатено согласно Резолуцијата 1244 на Советот за безбедност на Обединетите нации (СБОН) од 1999 година.
„Мислам дека нема можност да го прифатат нашето барање, не затоа што тоа би било лошо. Ако размислуваа подобро, тоа ќе придонесе за мир, и намалување на тензиите и можност за изнаоѓање компромисни решенија“,
вели претседателот на Србија.
Официјален Белград донесе одлука да испрати припадници на своите безбедносни сили како реакција на зголеменото присуство на косовската полиција на северот на Косово.
На 8 декември, косовските власти одлучија да ги испратат силите на косовската полиција на северот на Косово, каде што живее мнозинството од српското население. Два дена подоцна, косовските Срби ги блокираа патиштата на северот на Косово, спречувајќи го сообраќајот на граничните премини со Србија „Јариње“ и „Брњак“.
Барикадите беа поставени откако косовската полиција го уапси поранешниот српски полицаец Дејан Пантиќ под сомнение дека е вмешан во напад врз претставници на Централната изборна комисија.
Вучиќ изјави дека не знаел оти Србите ќе постават барикади на северот на Косово.
„Немав поим дека ќе постават барикади. Бев изненаден како и сите други“,
рече тој.