Kанцеларијата на ОБСЕ за демократски институции и човекови права (ОДИХР) денеска официјално ја започнува Специјалната мисија за проценка на изборите (СМПИ) закажани на 15 јули.
Мисијата е предводена од Лаима Андрикиене (Литванија) и се состои од главен тим од осум интернационални експерти со седиште во Скопје.
Од ОБСЕ денеска соопштија дека Специјалната мисија за проценка на изборите на ОДИХР ќе продолжи со набудувањето на изборниот процес што започна со Мисијата за набљудување на изборите на тогаш закажаните предвремени парламентарни избори на 12 април 2020 година, кои беа прекинати поради пандемијата со ковид-19.
„Мисијата ќе направи проценка на изборите за нивната усогласеност со заложбите на ОБСЕ и другите меѓународни обврски и стандарди за демократски избори, како и со националното законодавство. Набудувачите ќе ги следат фундаменталните аспекти на изборите, како што се регистрација на гласачите, регистрација на кандидатите, активности во кампањата и медиумско покривање на кампањата, работата на изборната администрација и релевантните државни органи, спроведување на правната рамка и решавање на изборните спорови. СМПИ на ОДИХР исто така ќе спроведе квалитативно и квантитативн мониторирање на медиумското покривање на изборната кампања“,
се вели во соопштението.
Исто така, од ОБСЕ посочуваат дека СМПИ на ОДИХР на денот на изборите ќе посети ограничен број избирачки места, но нема да спроведе систематско или сеопфатно набудување на постапките за гласање, броење и сумирање на гласовите на денот на изборите, во согласност со методологијата на ОДИХР за мисиите за проценка на изборите.
Ден по изборите, ОДИХР ќе ги објави своите прелиминарни заклучоци за изборниот процес и ќе разговара за своите наоди на прес-конференција, а конечниот извештај со проценка на целиот изборен процес, кој содржи препораки, ќе биде објавен приближно два месеци по завршувањето на изборниот процес, најавуваат од Мисијата на ОБСЕ.